Premer-ministr Álihan Smaiylov jumys saparymen Qostanai oblysyna keldi, - dep habarlaidy "Ult aqparat" primeminister.kz saityna silteme jasap.
Álihan Smaiylov birinshi kezekte Áýliekól aýylyna baryp, alapat orman órti saldarynan baspanasyz qalǵan azamattarǵa arnap salynyp jatqan jańa úilerdiń qurylysymen tanysty.
Qazirgi ýaqytta arnaiy bólingen 12 ga aýmaqta 91 úi salynyp jatyr, árqaisysynyń aýdany - 100 sharshy metr. Sondai-aq úilerdiń mańaiyndaǵy jer ýchaskelerine (10 sotyqtan) barlyq qajetti infraqurylym - gaz, sý, elektr energiiasy júrgiziledi. Úilerge aparar joldarǵa asfalt salynady.
Oblys ákiminiń birinshi orynbasary Ǵaýez Nurmuhambetovtiń aitýynsha, QazQSǴZI jobalaý institýty turǵynjailardy sý basýdyń aldyn alý maqsatynda geologiialyq izdenister negizinde irgetastardy jerasty sýlarynan 2,5 metr qashyqtyqta ornatý boiynsha joba ázirledi.
7 qyrkúiekte 13 merdigerlik uiym qurylys jumystaryna kiristi. Búgingi tańda barlyq úilerge arnap qazanshuńqyrlar qazyldy, 55 ýchaskede irgetas quiylyp, ekeýinde irgetas bloktaryn ornatý aiaqtaldy. Premer-ministrdiń tapsyrmasy boiynsha alańda ornatylǵan beinekameralardyń arqasynda qurylys barysy onlain rejimde baqylanyp otyr.
Premer-ministrdiń aitýynsha, barlyq qajetti jumystardy júrgizý úshin Úkimet 2,2 milliard teńgeden astam qarajat bólgenin atap ótti.
"Qazir ákimdik pen merdigerlerdiń aldynda qurylys jumystaryn belgilengen merzimde - 2 aida sapaly aiaqtaý mindeti tur. Bul másele Memleket basshysy men Úkimettiń erekshe baqylaýynda. Sondyqtan tapsyrmaǵa asa jaýapkershilikpen qaraý kerek", - dedi Álihan Smaiylov merdiger kompaniialardyń ókilderine.
Sodan keiin Premer-ministr Áýliekól aýylyndaǵy mektep bazasynda qurylǵan evakýatsiialyq pýnktke baryp, zardap shekkendermen kezdesti.
"Turǵyndardyń alapat tabiǵi órtterdiń saldarynan qandai qiyn jaǵdaiǵa tap bolǵanyn bilemiz. Osyndai qiyn sátte memleket barlyq qajetti qoldaýdy jyldam kórsetti. Bul jumys jalǵasady", - dedi Álihan Smaiylov.
Úkimet basshysy Prezidenttiń tiisti tapsyrmalar berip, jaǵdaidy jeke baqylaýyna alý úshin oqiǵa ornyna arnaiy kelgenin atap ótti.
"Osyndai qiyn-qystaý kezeńde sabyrlyq tanytqandaryńyz úshin alǵys aitamyn. Sondai-aq halqymyzdyń birligin kórsetip, otandastaryna qol ushyn sozǵan barlyq qazaqstandyqtarǵa da alǵys bildirgim keledi", - dedi Álihan Smaiylov.
Óz kezeginde qaýipsiz jerlerge kóshirilgen turǵyndar memlekettiń nazar aýdaryp, qoldaý kórsetkeni úshin alǵys aitty.
