Elimizdiń 2018 jyldyń 10 aiyndaǵy áleýmettik-ekonomikalyq damý qorytyndysyn qarastyrý barysynda QR Premer-Ministri Baqytjan Saǵyntaev ministrlikter men oblystardyń ákimderiniń nazaryn halyqtyń naqty tabysynyń ósimine taldaý jasaý qajettigine aýdardy, dep habarlaidy "Ult aqparat".
«Bári sol «statistikanyń málimeti durys emes» degen áńgimege tireledi. Bolmasa, ortasha jalaqy joǵary deisizder. Halyqtyń naqty tabysy tómen. Oǵan ne sebep? Soǵan analiz kerek. Bul birinshi kezekte quzyretti organdar: Eńbek jáne halyqty áleýmettik qorǵaý ministrligi men jergilikti jerdegi ákimdikterdiń jumysy», - dedi Úkimet basshysy.
Osy oraida premer-ministr kelesi aida ótetin Úkimet otyrysynda atalǵan másele qaita qaralatynyn jetkizdi.
«11 aidyń qorytyndysy boiynsha ótetin otyrysqa barlyqtaryńyz osy suraqqa jaýap berýge daiyn bolyńyzdar», - dedi Baqytjan Saǵyntaev.
Memleket basshysy «Qazaqstandyqtardyń ál-aýqatynyń ósýi: tabys pen turmys sapasyn arttyrý» joldaýynda birinshi kezekte halyqtyń tabysyn arttyrý mindetin qoiady.
Otyrysta aitylyp ótken derekterge sáikes, ekonomikanyń túrli salalarynda kórsetkishterdiń ósimi qamtamasyz etilgen. Sonymen qatar, Premer-Ministr óńirlerdegi halyqtyń naqty aqshalai tabysynyń tómengi kórsetkishterin atap ótti. Oryn alǵan jaǵdaidyń sebepteri men josparlanǵan sharalar týraly Qyzylorda oblysynyń ákimi Q. Kósherbaev, Mańǵystaý oblysynyń ákimi E. Toǵjanov, Almaty qalasynyń ákimi B. Baibek jáne Almaty oblysy ákiminiń orynbasary L. Turlashov baiandady.
Baiandamalardy tyńdaǵannan keiin, B. Saǵyntaev Eńbek jáne halyqty áleýmettik qorǵaý ministrligine, jergilikti atqarýshy organdarǵa elimizdegi halyqtyń tabysynyń tómen bolýy boiynsha qazirgi jaǵdaiǵa taldaý jasaýdy tapsyrdy. Halyq tabysynyń ataýly jáne naqty mánderdegi ósiminiń kórsetkishteri arasyndaǵy aiyrmashylyq týraly sóz qozǵaldy.
QR Ulttyq ekonomika ministrliginiń derekterine sáikes, 2018 jylǵy qańtar–tamyzda halyqtyń jan basyna shaqqandaǵy aqshalai ortasha kirisi 707,9 myń teńgeni qurap, 2017 jyldyń tiisti kezeńimen salystyrǵanda ataýly mánde 10%, naqty mánde 3,5% ósti. II toqsanda halyqtyń naqty kirisiniń ósýi tórt óńirde ortasha respýblikalyq deńgeiden (4,7%) joǵary ekeni baiqaldy.
Áleýmettik-ekonomikalyq damý týraly esepterdi ázirlegende birinshi kezekte halyqtyń tabysynyń kórsetkishterine nazar aýdarý tapsyryldy, bul oraida ákimdikter statistikalyq derekterdiń durys emestigin nemese basqa da sebepterdi syltaý qylmaýy tiis. 11 aidaǵy áleýmettik-ekonomikalyq damý qorytyndysynyń kelesi qaralýy osy máseleden bastalýy kerek.
