Búgin Túrkistan oblysyna resmi saparmen kelgen QR Premer-Ministri Asqar Mamin qalanyń damý perspektivalary jóninde keńes ótkizdi. Onyń barysynda oblys ortalyǵynda nysandardy salý boiynsha aǵymdaǵy jaǵdai men júrgizilip jatqan jumystar barysy sóz boldy, dep habarlaidy "Ult aqparat".
Selektorlyq rejimde ótken keńeske elimizdiń birqatar qala, oblys ákimderi men ministrlikterdiń ókilderi, jergilikti depýtattar men basqarma basshylary qatysty. Otyrysta Túrkistan qalasynyń ákimshilik-iskerlik ortalyǵyn, turǵyn úi alaptaryn jáne áleýmettik mańyzy bar nysandardy salý barysy aityldy.
Oblys ákimi Ómirzaq Shókeev atqarylyp jatqan qurylys jumystarynyń barysyn baiandap, Bas josparǵa sáikes salynatyn 22 nysannyń basym bóliginiń qurylysy bastalǵanyn atap ótti. Alaida, 4 nysannyń qurylys alańy qorshalǵanymen, jumystar kesheýildep jatqanyn jetkizdi.
«Qurylysy bastalmaǵan nysandar qatarynda Astana alańy, Týrizm kolledji, jabyq basseini bar sport kesheni jáne Olimpiadalyq rezervtegi sport mektebi bar. 5 nysanda jerdi rásimdeý jumystary aiaqtalyp, jobany ázirleý men qurylys jumystaryn bastaý jóninde óńirler men biznes ókilderine usynys berildi. Turǵyn úi keshenderi men mýzykalyq mektep, Qazposhta men qalalyq saiabaq, Halyqqa qyzmet kórsetý ortalyǵy men «Smart siti» jobasy aiasynda bailanys jelilerin tartý boiynsha jobalar ázirlenýde. Aǵymdaǵy jyly 3 nysan (oblys ákimdigi, Media ortalyǵy, saiabaq) paidalanýǵa beriledi dep josparlanyp otyr», - dedi Ómirzaq Shókeev.
Sonymen qatar aimaq basshysy ákimshilik ǵimarattary, turǵyn úi keshenderi, sport, densaýlyq saqtaý, bilim berý, mádeniet jáne áleýmettik salalardaǵy 80 nysan ákimshilik-iskerlik ortalyǵyna ornalastyrylǵanyn aityp ótti. Respýblikalyq biýdjetten 2019 jylǵa 28,2 mlrd teńge bólinip, ákimshilik ǵimarattardyń, bilim berý, turǵyn úi jáne infraqurylym nysandarynyń qurylysy qarqyndy júrip jatyr.
«Ákimshilik-iskerlik ortalyǵynda jalpy 114 turǵyn úidiń qurylysy júrgizilýde. Atap aitqanda, 1200 páterlik arendalyq 20 turǵyn úidiń 11-i maýsym aiynda tapsyrylady. Al, 540 páterlik 9 turǵyn úi (jeltoqsan aiynda paidalanýǵa beriledi. Kredittik 6 turǵyn úi tamyz aiynda tapsyrylady. Olar tiisti infraqurylym júielerimen josparǵa sáikes tolyq qamtamasyz etiledi. Sol siiaqty «Túrkistan» ÁKK jáne jeke investorlardyń esebinen 88 turǵyn úidiń qurylysy josparlanýda. Onyń ishinde memlekettik qyzmetkerlerdi turǵyn úimen qamtamasyz etý maqsatynda 10,0 mlrd teńgege 26 turǵyn úidiń qurylysy júrgizilip, jyl sońyna deiin paidalanýǵa berilmek. Qalǵan 62 turǵyn úidi 2020 jyly tapsyrý josparlanyp otyr», - dedi Ómirzaq Shókeev.
Eske salaiyq, Ministrler kabinetiniń basshysy búgin tańerteń Túrkistan oblysyna jumys saparymen keldi. Ol buǵan deiin oblystyń jańa ákimshilik iskerlik-ortalyǵynyń, 7 myń oryndyq stadionnyń, Oqýshylar saraiynyń qurylys alańynda boldy. Sondai-aq turǵyn úilerdiń, BAQ ókilderine arnalǵan jańa Mediaortalyqtyń jáne ózge de nysandardyń qurylysymen tanysty.
