Foto: Kazpravda.kz
Premer-ministr Oljas Bektenov Saran qalasyndaǵy jaǵdaiǵa qatysty úkimet otyrysynda qatty syn aitty, dep habarlaidy Tengrinews.kz.
Saran qalasyndaǵy jylytý maýsymynyń bastalýyna bailanysty másele kún tártibinen tys qaraldy.
Qaraǵandy oblysynyń ákimi Ermaǵanbet Bólekpaev qazirgi jaǵdai men júrgizilip jatqan jumystar týraly baiandady. Onyń aitýynsha, 13 qazanda qazandyqtyń avtomatikaly júiesindegi aqaýlarǵa bailanysty jumys toqtatylǵan. Qosalqy qazandyq iske qosylyp, jumystar ákimniń jeke baqylaýynda tur.
Oǵan jaýap retinde premer-ministr qalalyq jáne oblystyq ákimshiliktiń baqylaýy jetkiliksiz bolǵanyn atap ótip, barlyq jumystardyń búgin aiaqtalýyn tapsyrdy. Ol Saran qalasynyń ákimi men daiyndyq jumystaryna qatysty jalǵan aqparat bergen tulǵalardyń jaýapqa tartylatynyn qatań eskertti.
Otyrys sońynda premer-ministr Energetika ministrin Saran qalasyna tekserýge jiberetinin, tekserý nátijeleri quqyq qorǵaý organdaryna tapsyrylatynyn jáne kinálilerdiń qylmystyq jaýapkershilikke tartylatynyn málimdedi.
