QR Premer-Ministri Asqar Mamin eldiń áleýmettik-ekonomikalyq damýy boiynsha ministrlikter men ákimdikterge tapsyrmalar berdi, dep habarlaidy QazAqparat.
«Elimizdiń ekonomikasy senimdi ósý qarqynyn jalǵastyrýda. 10 aidyń qorytyndysy boiynsha jalpy ishki ónimniń ósýi 3,5 paiyzǵa deiin jedeldedi. Naqty sektorda óndiristiń ornyqty ósý qarqyny baiqalyp otyr. Máselen, óńdeý ónerkásibiniń óndiris kólemi 5,3 paiyzǵa ósti. Onyń ishinde mashina jasaýda 19,5 paiyzǵa, sonyń ishinde avtomobil jasaýda 23,4, lokomotivter men vagondar óndirisinde 59, qurylys materialdarynda 9,3, farmatsevtikada 33,6, plastmassa buiymdarynyń óndirisinde 36,5, kiim óndirisinde 11,4 paiyzǵa, jihaz óndirisinde 11,8, daiyn metall buiymdar óndirisinde 16,4 paiyzǵa ósim baiqalyp otyr», - dedi Úkimet basshysy.
Karantindik sharalardy birtindep jeńildetýdiń arqasynda qyzmet kórsetý sektoryndaǵy iskerlik belsendilik 3,4 paiyzǵa deiin qalpyna kelgen, bul bailanys qyzmetteri men saýda qarqynynyń joǵary bolýyna bailanysty.
«Investitsiialardyń ósý qarqyny birtindep qalpyna kelýde – ósim 2,5 paiyzǵa, al taý-ken óndirýdi eseptemegende 14 paiyz ósip otyr. Negizgi kapitalǵa investitsiialardyń joǵary ósimi qurylysta, óńdeý ónerkásibinde, aýyl sharýashylyǵynda, saýdada, jyljymaityn múlikpen operatsiialarda, qarjy qyzmetinde baiqalyp otyr. Qańtar-qazan ailarynyń qorytyndysy boiynsha Almaty, Jambyl oblystary men Nur-Sultan jáne Shymkent qalalarynda barlyq negizgi makrokórsetkishter ósken», - dep atap ótti A. Mamin.
Onyń aitýynsha, 6 negizgi kórsetkish boiynsha 9 óńirde ósim baiqalyp otyr. Olar Aqmola, Aqtóbe, Atyraý, Shyǵys Qazaqstan, Qostanai, Mańǵystaý, Pavlodar, Túrkistan oblystary men Almaty qalasy.
5 kórsetkish boiynsha eki óńirdiń serpini jaqsy. Bul Qyzylorda men Soltústik Qazaqstan oblystary. Al Qaraǵandy, Batys Qazaqstan oblystarynyń kórsetkishteri eń tómen.
«Jalpy azyq-túlik infliatsiiasynyń ósýin tejei aldyq. Osy baǵytta belsendi jumysty jalǵastyrý qajet. Ministrlikter men ákimdikterge otandyq óndiristi barynsha qoldaýdy, investitsiialar tartýdy, eksportty damytý, halyqtyń jumyspen qamtylýyn saqtaýdy jáne turaqty jumys oryndaryn qurýdy tapsyramyn. Biýdjet qarajatyn ýaqtyly igerý boiynsha da shara qabyldańyzdar», - dedi Asqar Mamin.
