QR Premer-Ministri Asqar Mamin múmkindigi shekteýli jandardy áleýmettik qorǵaý jóninde tapsyrmalar berdi, dep habarlaidy "Ult aqparat".
«Múgedektigi bar adamdardy áleýmettik qorǵaý memleket basa kóńil aýdaratyn óte mańyzdy másele. Bizdiń mindetimiz – múgedektigi bar adamdarǵa qolaily orta jasaý. «Nur Otan» partiiasynyń jańa baǵdarlamasyna sáikes aldaǵy 5 jylda jumyspen qamtylǵan múgedektigi bar adamdardyń úlesi 30 paiyzǵa ósýi tiis jáne de olar meditsinalyq ońaltýmen 100% qamtylady.
Elimizdi tuńǵysh ret múgedekter arbalaryn jasaityn otandyq óndiris iske qosyldy, bul arbaǵa muqtaj adamdardy bes jyl ishinde tolyq qamtamasyz etýge múmkindik beredi», - dedi Premer-Ministr Úkimet otyrysynda.
Múmkindigi shekteýli adamdardyń quqyǵyn qorǵaý jáne turmys sapasyn jaqsartý úshin Qazaqstanda 2025 jylǵa deiingi Ulttyq jospar iske asyrylyp jatyr, ol 64 keshendi is-sharadan turady. Biyl múgedektigi bar adamdardy áleýmettik qamtamasyz etýge 448 mlrd teńge jumsaldy, bul ótken jyldan 12 paiyzǵa kóp.
«Múgedektigi bar adamdarǵa usynylatyn kásipter men jumystar anyqtamalyǵy ázirlenip jatyr, bul olardy jumyspen qamtýdy ulǵaitýǵa yqpal etedi. Muny qoǵamdyq birlestikter usyndy, biz osyny qoldap, iske asyryp jatyrmyz. Balalardyń syrqatyn erte anyqtap, tekserý úshin 75 psihologiialyq-meditsinalyq jáne pedagogikalyq komissiia, 194 psihologiialyq-pedagogikalyq túzeý kabineti jumys isteidi. Kólik salasynda ony múmkindigi shekteýli adamdardyń paidalana alýy úshin eleýli jumys atqaryldy. Jol júrý úshin jeńildikti jaǵdailar jasaldy.
Vokzaldardyń 93 paiyzy múgedektigi bar adamdarǵa qyzmet kórsetý talaptaryna sáikes keledi. Barlyq jolaýshylar poiyzy 100 paiyz múgedek arbalarymen jabdyqtalǵan, qoǵamdyq avtokólik parkin jańartý jáne sáikes keltirý sharalary qabyldanyp jatyr», - dep atap ótti Mamin.
