Búgin Úkimet otyrysynda QR Premer-Ministri Baqytjan Saǵyntaev jol boiynda qyzmet kórsetý oryndaryn salýǵa jaýapty «QazAvtoJol» ulttyq kompaniiasynyń basshysy Ermek Qizatovtyń jumysyn synǵa aldy, dep habarlaidy QazAqparat tilshisi.
«Ermek Ánýarbekuly, slaidtaryńyzda kórsetilgen ár oblystaǵy isterdiń bári osydan eki jyl buryn aitylǵan standarttarǵa jatpaidy. Siz eki jyl buryn osynda baiandaǵanda Qazaqstan boiynsha standarttar bekitildi, tiptik keshender bolady dep aitqan bolatynsyz. Osy joly taǵy da Qyzylorda oblysyn kórsetip otyrsyz. Araǵa eki jyl salyp, «biz osyndai modýldi jasadyq, endi sony bekitemiz» dep málimdep jatyrsyz. Sonda eki jyl boiy ár oblysta ózderiniń túsiniginshe jumys istegen. Bul rette standartqa sai ma nemese sáikes kelmei me? Ony aityp otyrǵan sebebim, biz biznes ókildelimen kezdesip turamyz. Osy baǵytta kólik jáne logistika sharýalarmen ainalysatyn kásipkerler bar. Olardyń talaptary basqasha. Biznesmender sizdiń kórsetip otyrǵan tiptik modýlderińizdi surap otyrǵan joq, iaǵni kásipkerler basqa basymdyqtarǵa nazar aýdarýda. Sizdiń túsinigińiz bir bólek, biznestiń talaby bir bólek. Eki jyl ótkennen keiin «KazWay» (jol boiyndaǵy servistiń modýldik pavilony) degendi jasaimyz dep kórsetip otyrsyz. Sonda eki jyl boiy ne istedik?», - dedi Baqytjan Saǵyntaev «QazAvtoJol» basshysyna qarata.
Óz kezeginde Ermek Qizatov jobalar aiaqtalýǵa jaqyndaǵanyn, oblystarmen pysyqtalǵanyn aityp baqty.
Alaida Úkimet basshysy «QazAvtoJol» UK basshysynyń aitqan ýájimen kelispedi.
«Sizder aiaqtaǵanǵa deiin, búkil oblystar ózderiniń túsiniginde salyp tastaidy. Joldyń boiynda bos jer joq. Siz shetelge shyǵyp júrsiz, joldyń boiyndaǵy qyzmetterdiń qandai bolatynyn kórdińiz. Qazir tanystyrǵan jumystar sizderge emes, ákimderge tiesili. Ol biz oilaǵan tiptik pavilondarǵa sáikes kelmeidi», - dedi Premer- Ministr.
