25 shilde kúni Úkimet úiinde Qazaqstan Respýblikasynyń Premer-Ministri Baqytjan Saǵyntaev Qazaqstan Jazýshylar odaǵy basqarmasynyń Tóraǵasy Ulyqbek Esdáýlet jáne basqarma Tóraǵasynyń Birinshi orynbasary Aqberen Elgezekpen kezdesý ótkizdi. Bul týraly primeminister.kz saity habarlady.
Kezdesý barysynda Qazaqstannyń Jazýshylar odaǵynyń jańa shyǵarmashylyq jobalary men qazirgi máseleleri talqylandy.
Qazaqstannyń jazýshylar odaǵy — elimizdiń ádebietshi qaýymyn biriktiretin respýblikalyq qoǵamdyq birlestik formasyndaǵy shyǵarmashylyq uiym.
Aita ketsek, 1925 jyldyń 12 shildesinde quramyna Sáken Seifýllin men Beiimbet Mailin kirgen Qazaqstan proletariat jazýshylarynyń assotsiatsiiasyn (QazAPP) qurý jóninde biýro jasaqtalǵan bolatyn. Onyń tóraǵasy bolyp Sáken Seifýllin sailandy.
1932 jyly Qazaqstannyń Keńestik jazýshylar odaǵy uiymdastyryldy. Onyń alǵashqy quryltaiy 1934 jyly 12-18 maýsym aralyǵynda ótip, onda Qazaqstan jazýshylar odaǵynyń Tóraǵasy bolyp Iliias Jansúgirov sailanǵan edi. Sodan beri Odaqtyń basshylary bolyp kelesi qalamgerler sailanǵan:
Iliias Jansúgirov (1932-1935j.j), Ǵabbas Toǵjanov (1935-1936 j.j), Sábit Muqanov (1936-1937, 1943-1951 j.j), Muhamedjan Qarataev (1937-1938 j.j), Dihan Ábilev (1938-1939 j. j), Ábdildá Tájibaev (1939-1943 j.j), Ǵabiden Mustafin (1953-1956, 1962-1964 j.j), Ǵabit Músirepov (1956-1962, 1964-1966 j,j), Ádi Sháripov (1966-1971 j.j), Ánýar Álimjanov (1971-1979 j.j) , Juban Moldaǵaliev (1979-1983 j.j), Oljas Súleimenov (1983-1991 j.j), Qaldarbek Naimanbaev (1991-1996 j.j), Nurlan Orazalin (1996-2018 jyl), Ulyqbek Esdáýlet (2018 jyldan qazirgi kúnge deiin).
Búgingi tańda Qazaqstan Jazýshylar odaǵynyń 806 múshesi bar. Onyń 400-i Almaty qalasynda, 186-sy Astana qalasynda, qalǵandary oblystarda turady.
Qazaqstan Jazýshylarynyń ulttyq quramy qazaq, orys, uiǵyr, ózbek, kúrd, káris, sheshen, belorýs, tatar, nemis qalamgerlerinen turady. Qazaqstan Jazýshylar odaǵynyń respýblikamyzdyń 14 oblysynda filialdary jumys isteidi.
Qazaqstan Jazýshylar odaǵynyń janynda 17 janrlyq keńes pen komissiialary bar.
Qazaqstan Jazýshylar odaǵynyń quryltaishylyǵymen «Qazaq ádebieti» gazeti, «Juldyz», «Prostor» jýrnaldary jaryq kóredi.
