Premer-ministr Baqytjan Saǵyntaev EXPO-2017 kórmesin ótkizýge kóp qarajattyń jumsalyp jatqanyna qatysty synǵa jaýap berdi, - dep habarlaidy "Ult aqparat" kaz.tengrinews.kz portalyna silteme jasap.
"Alda úsh ai EXPO kórmesin ótkizý kerek. Men túsinip otyrmyn, adamdardyń kópshiligi nelikten sonsha qarajattyń jumsalǵanyn túsinbei jatady. 13 milliard teńge bar, onyń ishinde Almatydaǵy Ýniversiada oiyndaryn ótkizý barysynda únemdegen 4 million teńge bar. EXPO kórmesin ótkizý Astanaǵa ǵana emes, búkil elge áser etedi. Sondyqtan bul kórmeni joǵary deńgeide ótkizip, elimizdiń bedelin kórsetetin aitýly shara etip ótkizý kerek. Menińshe, biz EXPO-ny óte joǵary deńgeide ótkizemiz", - dedi Saǵyntaev úkimet otyrysy barysynda.
Sondai-aq, premer-ministr Ýniversiadanyń uiymdastyrýshylary men joǵary nátije kórsetken sportshylarǵa alǵys aityp, Mádeniet jáne sport ministrligine Ýniversiada jeńimpazdary men júldegerlerine, olardyń bapkerlerine tiesili tólemaqylardy der kezinde berýdi tapsyrdy.
"Sáikesinshe qaýly daiyndap qoiyńyzdar, uzaqqa sozbai premer-ministrdiń keńsesine ákelińizder. Sodan Almaty ákimdigimen birige otyryp qurylǵan sport ǵimarattary men nysandaryn áli qarai qoldaný máselelerin sheshý kerek. (...) Áset Órentaiuly (Astana qalasynyń ákimi Isekeshev - avtor.), siz ministrlikpen jáne Baýyrjan Qadyrǵaliulymen (Almaty qalasynyń ákimi Baibek - avtor.) sóilesip, olardyń osy jumysty qalai júrgizgenin bilip alýyńyzdy suraimyn. Sebebi Astanada mundai nysandar óte kóp, tájiribemen bólisý kerek", - dedi Saǵyntaev.
