Premer-Ministr Álihan Smaiylov beinekonferentsiia bailanysy rejiminde jeke biznes ókilderiniń, «Atameken» UKP jáne ortalyq memlekettik organdar basshylarynyń qatysýymen Otandyq kásipkerler keńesiniń kezekti otyrysyn ótkizdi, dep habarlaidy "Ult aqparat" primeminister.kz saityna silteme jasap.
Otyrysqa qatysýshylar Úkimettiń orta merzimdi kezeńge arnalǵan jańa ekonomikalyq saiasatynyń jobasyn qarady. Ol edáýir ekonomikalyq erkindikti qamtamasyz etýdi, ekonomikany ártaraptandyrýdy, eksporttyq áleýetti jáne eńbek ónimdiligin arttyrýdy, makroekonomikalyq turaqtylyqty qamtamasyz etýdi, densaýlyq saqtaý, bilim berý jáne áleýmettik qorǵaýdy damytýdy kózdeidi.
«Biz úshin ekonomikalyq ósimniń arqasynda azamattardyń ál-aýqatynyń artýy, tabysynyń ósýi mańyzdy. Bul oraida ekonomikalyq ósý turaqty bolýy kerek. Osyǵan bailanysty, birinshi kezekte kásipkerlikti damytýǵa basa nazar aýdarǵymyz keledi. Sonymen qatar barlyq basqa salalar da qurylymdalyp, osy qujatta kórsetilgen. Eger biznes ókilderiniń naqty usynystary bolsa, olardy eskerýge daiynbyz», — dedi Premer-Ministr. Sondai-aq ol biznes-qaýymdastyq pen azamattyq qoǵamdy talqylaýǵa belsendi túrde qatysýǵa shaqyrdy.
Sonymen qatar otyrysta agroónerkásip keshenin, taý-ken metallýrgiiasyn, kólik salasyn, energetikany jáne salyqtyq ákimshilendirýdi damytý máseleleri qaraldy.
Atap aitqanda, biznestiń problemalyq máselelerin «EPG Education» JShS direktory Dosym Besbai, «Olja Agro» JShS direktory Aidarbek Qojanazarov, «Atameken» UKP tóralqasynyń Geologiia salasy, taý-ken, kómir óndirý jáne metallýrgiia ónerkásibi komitetiniń tóraǵasy Nikolai Radostovets jáne «Vizor Qazaqstan» investitsiialyq kompaniiasynyń seriktesi Almas Chýkin kóterdi.
Aýyl sharýashylyǵyn retteý máselelerin talqylaý aiasynda Premer-Ministr salalyq ministrlik tarapynan jiberilgen kemshilikterge nazar aýdardy.
«Aýyl sharýashylyǵy ministrligi atqarylyp jatqan jumysty durys túsindirmeidi. Sondyqtan kásipkerlerde ne bolyp jatqany týraly qate túsinik qalyptasady. Bidaidy shyǵarýǵa eshqandai tyiym salynǵan joq! Biz kvota túrinde shekteýler engizdik, biraq ony ádettegi eksport kóleminen joǵary qoidyq», — dedi Álihan Smaiylov.
Úkimet basshysynyń aitýynsha, eger Qazaqstan aiyna shamamen 350 myń tonna astyq eksporttap otyrǵan bolsa, kvota biylǵy qyrkúiek aiynyń sońyna deiin qoldanystaǵy eksporttyq kelisimsharttardy shektemei, azyqtyq astyqty baqylaýsyz jappai shyǵarýdyń aldyn alýdy qamtamasyz etý úshin aiyna 500 myń tonnadan joǵary deńgeide belgilendi.
Sondai-aq Álihan Smaiylov AÓK sýbsidiialaý júiesin reformalaý taqyrybyn qozǵady.
«Biz barlyq biýdjet shyǵystaryn olardyń tiimdiligin arttyrý bóliginde, onyń ishinde aýyl sharýashylyǵy salasy boiynsha qaita qarap jatyrmyz. Qarjyny aýyl sharýashylyǵy taýar óndirýshilerin yntalandyrýǵa baǵyttaǵymyz keledi. Bul investitsiialyq sýbsidiialar, nesieler boiynsha paiyzdyq mólsherlemeni arzandatý, olardy odan da qoljetimdi etkimiz keledi. Aýyl sharýashylyǵyn qarjylandyrýdy qysqartqymyz joq. Kerisinshe, ony ulǵaitqymyz keledi. Alaida odan ekonomika úshin, jalpy el úshin paida bolýy kerek, árbir biýdjettik teńgeniń qaitarymyn arttyrǵymyz keledi», — dedi Premer-Ministr.
Otyrysty qorytyndylai kele, Álihan Smaiylov barlyq qatysýshylarǵa aitylǵan eskertýler men usynystar úshin alǵys aitty.
«Biz birlesip alǵa jyljýymyz kerek. Qandai da bir syndarly usynystar bolsa, olarǵa árqashan qulap asyp, óz jumysymyzda eskeretin bolamyz. Barlyq josparlanǵan ózgeristerdi júzege asyrýda bizneske jetekshi ról beriletinin taǵy da rastaǵym keledi. Úkimet kásipkerlik qoǵamdastyǵymen birlesip, biznesti júrgizý jaǵdaiyn jaqsartýdy jáne elimizdiń ekonomikasynyń ósýi men damýy, azamattardyń ál-aýqatyn arttyrý úshin alǵysharttar jasaýdy jalǵastyrady», — dep túiindedi Premer-Ministr.
