Arys qalasyna kelgen Qazaqstan Premer-Ministri Asqar Mamin jarylystan zardap shekken halyqtyń jai-kúiimen tanysyp, Túrkistan oblysynyń basshysy Ómirzaq Shókeevpen birge snariadtan zaqym kelgen turǵyn úiler men nysandardy aralap kórdi, dep habarlaidy QazAqparat tilshisi.
Úkimet basshysy tótenshe jaǵdai saldarynan qiraǵan turǵyn úiler, 4 qabatty aýrýhana ǵimaraty, Halyqqa qyzmet kórsetý ortalyǵy jáne I.Jýrba atyndaǵy mektepte boldy.
Odan keiin kúni keshe úilerine oralǵan arystyqtarmen sóilesip, olarǵa tiisti kómek kórsetiletinin jetkizdi.
«Elbasy men Prezidenttiń tapsyrmasy boiynsha búgin Arysqa kelip otyrmyz. Bul jaǵdai boiynsha Úkimetten arnaiy komissiia qurylǵan. Aldaǵy bir aidyń ishinde qalpyna keltirý jumystary jasalady. Infraqurylym jańadan tartylyp, nysandar men úilerdi jóndeýden ótkizemiz. Barlyq oblys ákimderiniń orynbasarlary osynda kelgen. Endi, jumystar 17 sektorǵa bólinip júrgiziledi. Árbir oblys ózderiniń jaýapkershiligin biledi. Jumystyń kólemin de túsinip otyr. Áleýmettik nysandar men infraqurylym, injenerlik qurylymdar, mektepter men aýrýhanalardy jóndeimiz. Onyń bári bir aidyń ishinde daiyn bolady. Birqatar oblys ákimderi osynda kelip, jumystaryn bastap jatyr», - dedi Asqar Mamin.
Óz kezeginde Arys halqynyń turǵyndary Premer-Ministrge jasalyp jatqan qamqorlyq pen kómekke dán rizashylyqtaryn bildirdi. Bir kisidei jumylyp, qol ushyn berip jatqan barsha qazaqstandyqtarǵa da alǵystaryn aitty.
Sondai-aq Úkimet basshysyna biylǵy jyly mektep bitirgen túlekterge tegin bilim alýǵa qolǵabys jasalsa degen tilekterin jetkizdi.
