Soltústik Qazaqstan oblysynda praimerizdiń ekinshi kezeńinde 600-den astam qatysýshy jaryssózge qatysyp jatyr, dep habarlaidy "Ult aqparat".
«Nur Otan» SQO filialy baspasóz qyzmetiniń málimetinshe, úmitkerler pikirsaiys barysynda ózekti máselelerdi talqylady. Sonyń ishinde bilik pen halyq arasynda keri bailanys ornatý, joldardy jóndeý, azamattardyń azyq-túlik sebetin jaqsartý, biznesti, densaýlyq saqtaý, bilim berý salalaryn damytý bar.
Alǵashqy jaryssóz 14 qyrkúiekte oblys ortalyǵynda ótti. Pikirsaiystyń bastapqy kúninde tikelei efirdi 1 myńǵa jýyq adam kórdi.
Eń kóp pikirtalasty «Nur Otan» partiiasy Petropavl qalalyq filialynyń qatysýshylary ótkizedi. 114 kandidat 20 topqa bólinip, jaryssózge qatysady.
Pikirsaiys eki raýndta ótedi: birinshi raýndta úmitkerler ózderiniń sailaý aldyndaǵy baǵdarlamalarymen tanystyrady, al ekinshi raýndta «suraq-jaýap» sessiiasyna qatysady.
Aita keteiik, keibir úmitkerler birqatar sebep boiynsha óz kandidatýralaryn alyp tastady. Biri – jeke basynyń problemasyna bailanysty praimerizge qatysa almaityn bolsa, endi biri – basqa aimaqqa qonys aýdarǵan.
«Qatysýshylardyń árqaisysynyń óz sailaýaldy baǵdarlamasy daiyn. Úgit-nasihat jumystarynyń barysy týraly olar uiymdastyrý komitetin habardar etedi, materialdardy www.primaries.kz saitta nemese arnaiy mobildi qosymshada ornalastyrady. Onymen elimizdiń kez kelgen partiia múshesi tanysa alady. Eger bireý pikirtalasqa qatysqysy kelmese, uiymdastyrý komiteti ony jarystan shyǵarady», - deidi partiianyń qalalyq filialy tóraǵasynyń birinshi orynbasary Keńes Muqyshev.
Pikirsaiys onlain daýys berý bastalardan bir kún buryn – 30 qyrkúiekte aiaqtalady.
.jpeg)