Kólik politsiiasy kólik nysandarynda dini ádebietterdi saqtaýǵa jáne taratýǵa tyiym salynatynyn eskertedi, dep habarlaidy "Ult aqparat" vedomstvonyń baspasóz qyzmetine silteme jasap.
Kóliktegi politsiia departamentiniń qyzmetkerleri Qazaqstan Respýblikasynyń aýmaǵynda tyiym salynǵan dini mazmundaǵy ádebietterdi jáne ózge de aqparat kózderin satýǵa, taratýǵa jáne saqtaýǵa bailanysty quqyq buzýshylyqtardy anyqtaýǵa baǵyttalǵan jedel-aldyn alý is-sharalaryn únemi ótkizedi.
Departamenttiń ekstremizmge qarsy is-qimyl basqarmasynyń bastyǵy Erlan Álimov atap ótkendei, ótken jyldyń qazan aiynda Kóliktegi politsiia departamenti men Lýgovoi stansasynyń jelilik bólimshe qyzmetkerleri jolaýshylar poiyzyn tekserý kezinde Qyrǵyz Respýblikasynyń 4 azamatyn ustady. Olardyń árqaisysynan saraptama qorytyndysy boiynsha Qazaqstan Respýblikasynyń aýmaǵynda tyiym salynǵan dini ádebietter alynyp, tárkilendi.
«Ustalǵandar Jambyl oblysy Merki aýdandyq sotynyń sheshimimen QR Ákimshilik quqyq buzý kodeksiniń 453-baby 4-bóligi boiynsha jaýapkershilikke tartyldy jáne árqaisysyna 176 myń 500 teńge kóleminde aiyppul salyndy», - deidi politsiia polkovnigi.
Aita keteiik, Qazaqstan Respýblikasynyń «Dini qyzmet jáne dini birlestikter týraly» Zańynyń 9-baby 2-tarmaǵyna sáikes dini ádebietti, dini mazmundaǵy ózge de aqparat kózderin satýǵa, taratýǵa jáne saqtaýǵa tek qana ǵibadat úilerinde (ǵimarattarynda), dini bilim berý uiymdarynda, sondai-aq oblystardyń, qalalardyń jergilikti atqarýshy organdary arnaiy belgilegen oryndarda ruqsat berilgen. Temir jol jáne áýe kóligi nysandarynda oǵan tyiym salynady.
