AQSh memlekettik hatshysy Maik Pompeo Ýkraina prezidenti Vladimir Zelenskiimen sóilesip, Qytaidyń Ýkrainadaǵy qozǵaltqysh óndiretin kompaniiany satyp alý talpynysyna bailanysty AQSh-tyń alańdaýshylyǵyn talqylady.
AQSh memlekettik departamentiniń osy týraly málimdemesinde Pompeonyń Zelenskiimen 26 tamyz kúni sóileskeni, memlekettik hatshynyń Qytaidyń Ýkrainadaǵy "Motor Sich" kompaniiasyn satyp alý nietine alańdaýshylyq bildirgeni jazylǵan.
Resmi Vashington osyǵan deiin Ýkrainadaǵy strategiialyq óndirýshiniń jáne onyń tehnologiialarynyń Qytaiǵa satylýyna qarsy lobbi júrgizgen.
Ótken jyldyń sońynda AQSh-tyń Ýkrainadan ketip jatqan elshisi amerikalyq kompaniialardyń "Motor Sichti" satyp múmkindikterin qarastyryp jatqanyn aitqan. "Motor Sich" - áskeri qorǵanys maqsatyndaǵy aviatsiialyq qozǵaltqyshtardy óndirý boiynsha álemniń jetekshi óndirýshileriniń biri.
"Motor Sichke" qyzyǵýshylyq tanytyp otyrǵan salmaqty amerikalyq jáne ózge de kompaniialar bar» dedi Ýiliam Teilor ótken jyldyń jeltoqsanynda. Teilor AQSh-tyń Ýkrainadaǵy elshisi qyzmetinen 2 qańtarda ketken bolatyn. Elshi málimdemesinde amerikalyq kompaniialardyń atyn atamady.
"Motor Sich" kompaniianyń bas direktory Viacheslav Bogýslaevtyń menshiginde. Habarlamalarǵa sáikes, ol aktsiialarynyń úlken bóligin Qytai kompaniialaryna satýǵa kelisip otyr. Alaida Ýkraina úkimetiniń kelisimi áli alynǵan joq.
Memlekettik departamenttiń málimdemesine sáikes, Pompeo men Zelenskii sondai-aq Belarýstegi jaǵdaidy, Ýkrainanyń koronavirýspen kúresin, Ýkraina shyǵysyndaǵy Resei agressiiasyn diplomatiialyq jolmen reteý jáne Ýkrainanyń Krymdaǵy sýverenitetin qalpyna keltirý máselelerin talqylady.
