Vashington Qyrym túbegin iemdengisi kelgen Máskeýdiń áreketin eshqashan zańdy dep tanymaidy, - dep málimdedi AQSh memlekettik hatshysy Maik Pompeo.
"2018 jyly shilde aiynda qol qoiylǵan Qyrym deklaratsiiasynda atap kórsetilgendei, AQSh Reseidiń túbekti iemdený áreketin eshqashan zańdy dep moiyndamaidy. Biz Reseidi Qyrymdy okkýpatsiialaýyn toqtatýǵa shaqyramyz. Alty jyl ótkennen keiin de Resei zańsyz áreketin zańdastyrý úshin ótirik pen jalǵan aqparatqa iek artyp keledi. Onyń talpynysy sátsiz aiaqtalmaq" dedi Pompeo.
Ol sonymen birge halyqaralyq qaýymdastyq Reseidiń Ýkraina aýmaǵyna basyp kirýin eshqashan qoldamaidy dedi.
"AQSh Reseidiń Qyrymdaǵy zańsyz áreketin jáne Ýkrainaǵa qarsy agressiiasyn (onyń ishinde Donbas ta bar - M.P) aiyptaidy. Ýkrainaǵa Qyrymdy qaitarmaiynsha jáne Minsk kelisim-sharty boiynsha alǵan mindettemelerin tolyǵymen oryndamaiynsha Reseige salynǵan sanktsiia kúshinde qalady" dedi ol.
Pompeo málimdemesi jariialanbai turyp birneshe saǵat buryn Ýkraina prezidenti Vladimir Zelenskii buiryq shyǵaryp, 26 aqpandy "Reseidiń Qyrymdaǵy basqynshylyǵyna qarsylyq kúni" dep jariialaǵan.
2014 jyly Resei Ýkrainanyń Qyrym aimaǵyn anneksiialap alǵan edi. Halyqaralyq uiymdar Reseidiń bul áreketin zańsyz dep synaǵan. Batys elderi Qyrym anneksiiasynan keiin Reseige sanktsiia salǵan. Máskeý Qyrymdy anneksiialap alǵanyn joqqa shyǵarady jáne muny «tarihi ádildiktiń ornaýy» dep ataidy. 2014 jyldan beri Ýkraina shyǵysyndaǵy qaqtyǵystan 13 myńnan astam adam kóz jumǵan.
