Saraptama barysynda úsh jasardyń qyzdyń denesinen zorlyq-zombylyq belgileri tabylmaǵan, dep habarlaidy Shymkent qalasy politsiia departamentiniń baspasóz qyzmeti.
Saraptamanyń aldyn ala qorytyndysy boiynsha qyz qulaý saldarynan óz qusyǵyna tunshyǵyp qalýy múmkin.
"Aldyn ala saraptamaǵa sáikes, oǵan "qusý massasynyń mehanikalyq asfiksiiasy" degen diagnoz qoiylǵan. Iaǵni, qyz óz qusyǵyna tunshyǵyp kóz jumýy múmkin. Sebebi onyń ishki qurylysynda shaiqalý belgileri bar. Saraptama barysynda qyzdyń denesinen zorlyq-zombylyq belgileri tabylmady", - delingen habarlamada.
Sonymen qatar baspasóz qyzmeti kishkentai qyzdyń tórt jasqa tolmaǵanyn atap ótti.
"Búginde istiń mán-jaiyn anyqtaýǵa baǵyttalǵan barlyq qajetti jedel-tergeý is-sharasy júrgizilýde. Tiisti saraptamalar taǵaiyndalǵan. Isti tergeý Shymkent qalasy prokýratýrasy men politsiia departamenti basshylyǵynyń jiti baqylaýynda", - dep habarlady politsiia qyzmetkerleri.
Qalǵan aqparat QR qylmystyq-protsestik kodekstiń 201-babyna (sotqa deiingi tergep-tekserý derekterin jariia etýge jol bermeý) sáikes jariialanbaidy.
Esterińizge sala keteiik, osyǵan deiin Shymkent qalasyndaǵy eski garajdardyń birinen kishkentai qyzdyń óli denesi tabylǵan edi. Kýáger qyz balanyń ish kiimi bolmaǵanyn, beti kógerip ketkenin aitqan. Jergilikti politsiia bolǵan oqiǵany rastaǵan.
