sýret ashyq derekkózden alyndy
Almaty qalasynyń politsiiasy "Sergek" arqyly mopedpen júretin kýrerlerdi baqylaidy, dep habarlaidy Sputnik Qazaqstan agenttigi Habar 24 arnasyna silteme jasap.
Megapoliste mopedterdiń qatysýymen jol oqiǵalary jiilep ketti. Oǵan qosa, kýrerler erejeni saqtamaidy, shlem taqpaidy, jaiaý júrginshiler jolyna shyǵyp ketedi. Osydan keiin almatylyq politseiler jetkizý qyzmetteriniń ókilderimen kezdesip, naqty sharalardy qolǵa alýǵa kelisti. Memorandýmǵa da qol qoiyldy.
Sergek Development kompaniiasynyń ókili Nurbol Ámirjannyń aitýynsha, pilottyq joba boiynsha kýrerlikpen ainalysatyn barlyq kompaniialardyń jetkizý qyzmetkerleri týraly aqparat engizilgen arnaiy baza jasaqtalady.
"Ár jetkizý qyzmetiniń ókiline jaryqpen shaǵylysatyn nomer taǵaiyndalady. Sol nomer arqyly onyń qozǵalysy "Sergek" kameralarymen qadaǵalanady. Joba jol-kólik oqiǵalaryn azaitýǵa múmkindik beredi", - deidi Ámirjan.
Pilottyq joba ázirge profilaktikalyq maqsatta qolǵa alyndy. Qazirgi tańda mopedterge qatysty tiisti zańnamalarǵa ózgerister engizý qarastyrylýda. Zań kúshine engen soń, talap ta kúshetiledi.
"Qazaqstan Respýblikasy Ákimshilik kodeksiniń 615-babynyń normalary boiynsha biz ony olardy ákimshilik jaýapkershilikke tarta alamyz. Olar moped degen uǵymmen emes, jol júrý qozǵalysyna basqa da qatysýshylar degen uǵymmen. Negizi zańnama kúsheitiledi qazirgi tańda mindetti túrde. Mopedterdi bólek kólik quraly etip sanaidy, sondyqtan, mopedti tizgindegen azamattar mindetti túrde óz kólik quralyn tirkeýge qoiý kerek jáne jol júrý kýáligin iemdenýi tiis", - dep atap kórsetti politsianyń resmi ókili Saltanat Ázirbek.
Resmi málimetke sáikes, jyl basynan beri Almatyta mopedterdiń qatysýymen 199 jol-kólik oqiǵasy tirkelgen. Bir adam qaza taýyp, qalǵandary ártúrli jaraqat alǵan.
