Aqmola oblysynda politsiia qyzmetkerleri men volonterler elordaǵa aparatyn ainalma joldardy baqylaýda, dep habarlaidy "Ult aqparat" aýmaqtyq PD baspasóz qyzmetine silteme jasap.
Vedomstvonyń málimetinshe, 22 naýryzdan bastap Nur-Sultan qalasynan shyǵatyn jáne kiretin joldar jabyldy. Alaida, keibir júrgizýshiler bul talaptarǵa qulaq aspai ainalma jáne dala joly arqyly elordaǵa barýǵa tyrysyp baǵýda. Osyndai zań buzýshylyqqa jol bermeý úshin tártip saqshylar elordaǵa qatynaityn kúre joldan bólek, ainalma jáne qara joldarda da baqylaýdy kúsheitýde.
«Qazirgi kezde elordaǵa aparatyn joldardy baqylaý maqsatynda topografikalyq spýtnik kartasy zerttelýde. Sondai-aq, aýmaqty baqylaý úshin kvadrokopter pailanýda. Departament basshylyǵynyń tapsyrmasymen karantin aýmaǵyna zańsyz kirý oqiǵasyn jedel aldyn alý boiynsha jol talǵamaityn qyzmettik kólik, qarda júretin kólik siiaqty arnaiy tehnika qoldanylýda», - deidi vedomstvodan.
Tártip saqshylaryna jaqyn mańdaǵy eldi mekenderde turatyn qarda júretin kólikterdiń ieleri kómektesýde. Olar volonter retinde elorda syrtynda blok beketer aýmaǵyn baqylaýda.
Aita keteiik, QR IIM tapsyrmasymen Nur-Sultan qalasynan 30 shaqyrym radiýstegi Aqmola oblysynyń joldarynyń barlyq baǵytynda 15 blok beket ornalasqan. Onda politsiianyń 100 astam qyzmetkeri táýlik boiy baqylaý júrgizedi.
