Ishki ister ministri Qalmuhanbet Qasymov quqyq qorǵaý organdaryna qatysty aitylatyn syndarǵa jaýap berdi, dep habarlaidy Baq.kz tilshisi.
Bul týraly ol «Quqyqtyq tártip jáne qaýipsizdikti nyǵaitý» taqyrybynda Ortalyq kommýnikatsiialar qyzmetinde ótken baspasóz máslihatynda málimdedi.
«Ókinishke qarai, sońǵy ýaqytta IID, sondai-aq politsiia qatań synǵa qalyp otyr. Kóp jaǵdaida syn oryndy aitylady. Rasynda, politsiia qyzmetinde sheshilmegen máseleler kóp. Biz olarmen jumys isteimiz, máselelerdi qoǵamnan jasyrmaimyz», - dedi Qasymov.
Onyń aitýynsha, sońǵy jyldary IIM júiesi ashyq bola bastaǵanyn atap ótti.
«Internette IIM resmi saity bar. Ishki ister ministriniń blogy jumys isteidi, sondai-aq azamattar qyzmetkerlerdiń áreketine qatysty aryzdanyp, IIO bólimsheleriniń qyzmetin jetildirý boiynsha usynys engizýge arnalǵan IIM Biryńǵai senim telefony iske qosyldy. IIO qyzmetindegi máseleler boiynsha úkimettik emes uiymdarmen, IID janyndaǵy konsýltativti-keńesshi organdarymen bailanysa Qoǵamdyq keńes jumys isteidi. Keńes halyqpen jii esep berý jiyndaryn ótkizedi. Ministr, territorialdy organ basshylary men ýchaskelik politsiia inspektorlary, budan bólek ministrlik jylyna eki ret Parlament Májilisindegi Úkimet saǵatynda ministrlik qyzmetiniń jeke baǵyttary boiynsha jumystardyń nátijeleri týraly esep beredi. Ministrlik basshylyǵy, aimaqtyq departament basshylary azamattardyń jeke máseleleri boiynsha turaqty túrde qabyldaýlar júrgizedi», - dedi Qasymov.
Ol ministrliktiń BAQ-taǵy syni jariialanymdaryna monitoring júrgizetinin atap ótti.
«Tártip pen zań buzýshylyqtar anyqtalǵan kezde árbir aqparat boiynsha qyzmetkerdi qyzmetinen bosatýǵa deiingi qatań sharalar qoldanylady. Aǵymdaǵy jyly jaǵymsyz sebeptermen IIO-dan 600 qyzmetker jumystan shyǵaryldy», - dep aitty ministr.
Eske sala ketsek, Ishki ister ministri Qalmuhanbet Qasymov Sochi olimpiadasynyń qola júldegeri Denis Tenniń ólimine qatysty pikir bildergen bolatyn.
