Qyzmetkerler eshqandai qarsylyq kórsetpesten Almaty jáne Jambyl oblystarynyń Politsiia departamentteriniń ǵimarattaryn qarý-jaraq, oq-dárimen birge tastap ketken. Bul týraly QR Bas prokýratýrasy Arnaiy prokýrorlar qyzmetiniń bastyǵy Rizabek Ojarov aitty, dep habarlaidy QazAqparat.
«Ókinishke orai, memlekettiń jáne qoǵam qaýipsizdiginiń múddesine qaishy is-áreket oryn aldy. Qyzmetkerler eshqandai qarsylyq kórsetpesten Almaty jáne Jambyl oblystarynyń Politsiia departamentteriniń ǵimarattaryn qarý-jaraq, oq-dárimen birge tastap ketken», - dedi Rizabek Ojarov Ortalyq kommýnikatsiialar qyzmetindegi brifing barysynda.
Onyń atap ótýinshe, osynyń saldarynan búlikshiler 1,5 myńnan astam úlken arsenalǵa ie bolǵan.
«Olardyń ishinde granatomet, pýlemet, avtomat, tapanshalar men granatalar bar. Munyń barlyǵy – ańshylyq dúkenderden urlanǵan qarýlardy eseptemegende. Ázirge 967 dana qarý tabyldy, qalǵandarynyń qaida ekeni áli de belgisiz. Politsiia olardy izdeýde», - dedi Bas prokýratýra ókili.
