Almaty oblysynyń politseileri qaraýsyz maldyń qatysýymen bolatyn jol-kólik oqiǵalarynyń aldyn alý boiynsha alǵysharttarmen bólisti, dep habarlaidy "Ult aqparat" Almaty oblystyq politsiia departamentiniń baspasóz qyzmetine silteme jasap.
Eńbekshiqazaq APB qarasty Shelek PB qyzmetkerleriniń málimetine sáikes, jyl basynan beri maldyń qatysýymen 8 jol-kólik oqiǵasy oryn alǵan.
Tórt túliktiń jol boiynda qaraýsyz jaiylyp júrýi kólik qozǵalysyna kedergi keltiretini bárimizge belgili. Ásirese, qazirgi ýaqytta maldyń taýdan túsýine bailanysty maldardyń jolǵa shyǵý derekteri jii oryn alady.
"Osy oraida, mal ielerinen ózderiniń maldaryn qaraýsyz qaldyrmaýlyryn jáne qarańǵylyq túskennen keiin maldy joldardyń mańynda jaimaý qajettiligin eskertkim keledi. Sonymen qatar, barlyq júrgizýshilerdi jyldamdyqty shekten tys asyrmaýǵa shaqyramyn. Arnaiy belgiler turǵan aýmaqtan jyldamdyqty azaityp ótken abzal. Ózińizdiń jáne janyńyzdaǵy jolaýshylardyń bas amandyǵy úshin jol boiynan tórt túlik mal men jabaiy ańdardyń da kútpegen jerden shyǵýy múmkin ekenin umytpaǵanyńyz jón", - dep eskertti Shelek PB bastyǵy, politsiia podpolkovnigi Dáýren Jalǵasbaev.
Maldardyń erkin qaraýsyz jaiylýyna jol bermeý mal urlyǵynyń aldyn alýǵa jáne maldyń qatysýymen bolatyn jol-kólik oqiǵalaryna jol bermeýge baǵyttalǵan. Jolǵa shyqqan maldyń kesirinen bolǵan jol-kólik oqiǵasy júrgizýshiler men jolaýshylardyń jaraqat alýyna, adamdardyń ólimine ákelip soǵady.
"Politsiia qyzmetkerlerimen júrgiziletin túsindirý jumystary men eskertýlerge qaramastan malyn qaraýsyz qaldyryp, sonyń saldarynan materialdyq shyǵyn keltirilip jatatyn jaǵdailar da jii kezdesedi. Maldardy baǵymsyz (erkin) jaiýǵa jol bergen azamattar, zańǵa sáikes ákimshilik jaýapkershilikke tartylady. Oǵan mysal, iesiz júrgen maldardyń Tasqarasý aýylynda ornalasqan Almabai jeke sharýashylyǵynyń egistik alqabyna kirip, egistik alqabyndaǵy egistigin jep, taptaǵany boiynsha A. esimdi azamattyń aryzdanýy. Atalǵan derek boiynsha mal iesine QR ÁQBtK-niń 147-babynyń 1-bóligi jáne 408-babynyń 1-bóligimen aiyppul salyndy", – deidi Uiǵyr APB Tasqarasý aýylynyń ýchaskelik politsiia inspektory E.Týrýsbekov.
Osy oraida, tártip saqshylary maldy qaraýsyz qaldyrý jol-kólik oqiǵasyna ákelip soǵatynyn eskertip, turǵyndardan jol boiyna mal jaimaýdy suraidy.
