Ótken aptada elimizdiń aýmaǵynda 3 213 qylmys tirkeldi. Bul týraly QR IIM baspasóz qyzmetiniń ókili Shuǵyla Turlybek aitty, dep habarlaidy QazAqparat.
«Bir apta ishinde 3 213 qylmys jasaldy, onyń 2 158-i táýlik ishinde ashyldy. Politsiia qyzmetkerleri «izin sýytpai» 8 kisi óltirýdi, 7 ólimge ákep soqqan densaýlyqqa qasaqana aýyr ziian keltirýdi, 1 qaraqshylyq, 38 tonaý jáne 470 bóten múlikti urlaý qylmystaryn ashty», - dedi ol IIM baspasóz qyzmeti alańynda ótken brifing barysynda.
Sonymen qatar Shuǵyla Turlybek ótken aptada IIM-de ishki ister organdary jumysynyń qorytyndysy shyǵarylǵan keńeitilgen alqa otyrysy ótkenin, jiynda eldegi qylmys deńgeii tómendegeni atalǵanyn aitty.
«Aýyr qylmystar, densaýlyqqa aýyr ziian keltirý, qaraqshylyq, tonaý, zorlaý, urlyq, mal urlyǵy, buzaqylyq sany azaiǵan. Kámeletke tolmaǵandar tarapynan oryn alǵan qylmystar 40, mas kúiinde jasalǵandary 20 paiyzǵa tómendegen. Qoǵamdyq oryndarda jáne kóshelerdegi quqyq buzýshylyq sany úshten birge qysqarǵan», - dedi baspasóz ókili.
