Almaty oblysynyń politseileri aimaqta ystyq aýa raiynyń saqtalýyna bailanysty júrgizýshilerge saqtyq sharalaryn saqtaý týraly ótinish bildirdi, dep habarlaidy QazAqparat tilshisi.
«Alys saparǵa jol júrýdi tańerteń nemese keshke, iaǵni kún joq kezde josparlaý qajet. Dári-dármekti júksalǵyshta emes, ózimen birge qobdishasynda ustaǵan jón jáne tátti sýsyn emes, taza sý ishýge keńes beremiz. Sebebi tátti sýsyn adamdy shóldete beredi. Sondai-aq kúnniń ystyǵynan asfalt óz sapasyn joǵaltady jáne taiǵaq bolady. Sondyqtan jolda barynsha abai bolý kerek. Kóliktiń sýytý júiesin únemi baqylap, termometrdiń »qyzyl« aimaqqa shyǵýyna jol bermeý kerek. Dizeldi otyn men benzin joǵary temperatýra kezinde býlanady. Bul órttiń shyǵýyna ákelýi múmkin. Osyǵan bailanysty, barlyǵyn aldyn-ala tekserip otyrý qajet. Kúnniń aptap ystyǵynda júrek-qantamyr jáne sozylmaly aýrýlary bar júrgizýshilerge osy kezeńde jol júrýden bas tartýǵa keńes beremiz. Kólikti júrgizip kele jatyp ózin jaisyz sezinetin bolsa, júrgizýshi kólikti toqtatýy kerek. Jaǵdaiy nasharlaǵan jaǵdaida tez arada 112 nemese 102 qutqarý qyzmetine qońyraý shalǵany jón. Sondai-aq ystyq aýa raiynda kóptegen adamdarda bastyń ainalýy, álsizdik, uiqyshyldyq paida bolyp, uiyqtaý qaýpi artatynyn eske salamyz» delingen Almaty oblystyq Politsiia departamentiniń baspasóz qyzmeti taratqan habarlamada.
Esterińizge sala keteiik, oblystyq TJD-i óńirdiń turǵyndaryna 19-22 shilde aralyǵynda aýa temperatýrasynyń 43 gradýsqa deiin kóteriletinin eskertip, sms habarlama taratqan bolatyn.
