Kámelettik jasqa tolmaǵandar isi boiynsha inspektor Azamat Nurpeiisov Denis Tenniń ólimine qatysty sot protsesinde negizgi kýáger boldy, dep jazady Sputnik agenttigi.
Onyń aitýynsha, sol kúni qalanyń ortalyq stadionynda fýtbol matchy ótip jatqan. Nurpeiisov óziniń áriptesimen birge sol jerde saǵat 16:00-de sapta turýy kerek bolǵan.
"19 shilde kúni biz Qurmanǵazy kóshesiniń boiymen batysqa qarai qozǵalyp bara jattyq. Abylai han kóshesinen ótken kezde júgirip bara jatqan syrt kelbeti aziat úsh jigitti kórdik. Arasynda qara fýtbolka kigen bireýi Báiseiitova kóshesiniń boiymen jaiaý júrginshiler jolyna jetpei Toyota Camry kóliginiń aldynan júgirip shyǵyp, avtomobildiń kapotyna qulady. Aq fýtbolka kigen ekinshisi jattyǵý alańyna qarai júgirip, úshinshisi ony qýyp jetpek boldy", — dedi Nurpeiisov.
Tergeý amaldary barysynda avtomobildiń aldynan Arman Qudaibergenovtiń júgirip shyqqany belgili boldy.
"Áriptesim ekeýimiz olar oinap júr eken dep oiladyq. Kólikti toqtatyp, jigitterge qarai júgirdim. Sol jerde aq fýtbolkadaǵy jigittiń áreń turyp, keiin qulaǵanyn kórdim. Onyń aiaǵynan qannyń qalai tamshylap jatqanyn baiqadym. Keiin janymyzǵa adamdar kele bastady. Olarǵa jedel járdem shaqyryp, alǵashqy kómek kórsetý kerektigin aittym", — dep eske aldy politsei qaiǵyly oqiǵa bolǵan kúndi.
Nurpeiisov áriptesterine ratsiia arqyly baǵyttama berip, qashyp bara jatqandardyń sońynan júgiredi. Alaida olardyń qai kóshege burylǵanyn kórmegendikten, kóz jazyp qalady. Panfilov kóshesine júgirip shyqqannan keiin politsei jaiaý júrginshilerden jigitter týraly suraǵanynda turǵyndar olardyń Nazarbaev kóshesine qarai ketkenin aitqan.
"Dabyl úni shyqqan jaqqa qarai júgirdim. Kólikpen ótip bara jatqan vzvod komandiri toqtap, meni otyrǵyzyp aldy. Birge oqiǵa bolǵan jerge bardyq. Keiin Shevchenko boiymen Nazarbaev kóshesine qarai júgirdim. Sol jerde jumyskerlerden eki jigit týraly suraǵanymda olar kórmegenderin aitty", — dep málimdedi Nurpeiisov.
Marqum mánerlep syrǵanaýshynyń anasy Oksana Ten politseidiń sózin tyńdaǵannan keiin odan nege qansyrap jatqan adamdy kórip turyp ózi jedel járdem shaqyrmaǵany týraly surady.
Azamat Nurpeiisov jaraqaty tym aýyr dep oilamaǵanyn aitty.
"Men úshin sol sátte kúdiktilerdiń basqa adamdardy jaraqattamaýy mańyzdy boldy", — dedi politsei.
Sondai-aq, Nurpeiisov dál sol sátte qaltasynda uialy telefonnyń bolmaǵanyn, áriptesterine ratsiia arqyly habar bergenin aitty.
Denis Tenniń qazasy
Qazaqstandyq mánerlep syrǵanaýshy Denis Ten 2018 jyldyń 19 shildesinde 25 jasynda kóz jumdy. Kóliginiń ainasyn urlaǵandardy toqtatpaq bolǵan sportshyny urylar san tusynan pyshaqpen jaraqattady.
Arman Qudaibergenov, Nuraly Qiiasov jáne Janar Tolybaeva kisi óltirdi degen kúdikke ilindi. Er adamdar tonap, kisi óltirgeni, al áiel qylmys týraly habarlamaǵany úshin aiyptalyp otyr.
Sotta marqum mánerlep syrǵanaýshynyń anasy Oksana Ten ulynyń tapsyryspen óltirilgenine senimdi ekenin aitty. Sondai-aq, sotta oqiǵa bolǵan jerge birinshi bolyp jetken eki politsei kýáger boldy.
