Foto: aa.com.tr
AQSh prezidenti Djo Baidenniń ákimshiligi Ýkraina biligin qarsy shabýyl uiymdastyrýdy baiaýlatpaýǵa úndedi. Bul jóninde dúisenbide Baidenniń Polshaǵa sapary qarsańynda Politico basylymy jariialaǵan úlken materialda aitylady. Baiden Reseidiń Ýkrainaǵa basyp kirgenine bir jyl tolǵanda Kievke saparlap otyr.
Politico-nyń jazýyna qaraǵanda, Amerikanyń kóptegen resmi ókili Ýkrainadaǵy maidan syn sátke jaqyndady dep esepteidi. Olardyń oiynsha, Ýkraina byltyr kúzdegi jetistigin saqtap qalý úshin qarsy shabýyl uiymdastyrýǵa asyqqany jón. Taǵy bir faktor – ýaqyt: Vashington qazir Ýkrainaǵa qyzý qoldaý bildirip otyrǵan Batys elderiniń ekpini báseńdep, Ýkrainaǵa berilip jatqan qarý azaiyp qala ma dep qaýiptenedi.
Ýkraina prezidenti Vladimir Zelenskii senbide Italiia baspasózine bergen suhbatynda "Ýkraina az ýaqytta jeńiske jetkizetin qysqa soǵysqa" daiyndalyp jatqanyn málimdegen.
Zelenskii Reseimen aradaǵy konfliktini "muzdatyp qoiýǵa" qarsy ekenin aityp, 2014 jáne 2015 jyldary jasalǵan Minsk kelisimi Reseidiń soǵysqa daiyndalýyna mursat berdi degen bolatyn. Batystyń birqatar elderi bul kelisim Ýkrainanyń Resei agressiiasyna qarsy turýyna daiyndalý úshin múmkindik berdi degen.
Zelenskii Ýkraina qarsy shabýylǵa daiyndalyp jatqanyn rastaǵan. Biraq ol ýkrain áskeri jarty jyldan beri qorǵap kele jatqan Bahmýt qalasyn tastap ketýi múmkin ekenin joqqa shyǵarmaǵan. Zelenskiidiń sózinshe, Ýkraina Bahmýtty qorǵaidy, biraq ol "esh maǵynasyz qorǵai beredi" degen sóz emes. "Biz aqylǵa qonymdy sátke deiin soǵysa beremiz. Resei Kramatorsk pen Slavianskige deiin, odan ári Donbasstyń shekarasyna deiin shamasy kelse, shabýyl jasamaq" dedi ol.
Qańtar aiynda arasynda AQSh pen Batystyń keibir elderi aldaǵy shabýyl úshin Ýkrainaǵa tank berýge daiyn ekenin habarlaǵan. Biraq ázirshe ol tankiler jetken joq. Ulybritaniianyń The Times gazetiniń jazýynsha, Kiev odaqtastary jalpy jiyntyǵy 320 tanki beredi dep kútip otyr, al qazirgi jaǵdaiǵa qaraǵanda, sáýirdiń bas kezine qarai nebári 50 tank qana alǵy shepke jetýi múmkin.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
