Oqýlyqta poligrafiialyq aqaý tabylǵan jaǵdaida baspa ony óz qarajaty esebinen aýystyrady. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Memleket basshysynyń 2020 jylǵy 27 mamyrdaǵy Qazaqstan Respýblikasy Prezidentiniń janyndaǵy Ulttyq qoǵamdyq senim keńesiniń úshinshi otyrysynda bergen tapsyrmasyn oryndaý maqsatynda oqýlyqtardy ázirleý sapasyn arttyrý, oqýlyqtarǵa saraptama jáne synaq ótkizýge qoiylatyn talaptar jóninde birqatar sharalar qabyldandy. Oqýlyqtardy daiyndaý jáne saraptama ótkizý jónindegi jumysty uiymdastyrý qaǵidalaryna oqýlyqtardyń ázirlený sapasyna baspalardyń jaýapkershiligin arttyrý, avtorlardyń mindetti túrde oqýdan ótý qajettiligi bóliginde ózgerister men tolyqtyrýlar engizildi. Baspaishilik saraptamaǵa, materialdyń salmaǵyna, sapasyna, illiýstratsiialar men oqýlyqtar formatyna qoiylatyn sanitarlyq-gigienalyq normalardy saqtaýǵa qoiylatyn talaptar arttyryldy»,- dedi Asqar Mamin.
Sonymen qatar, Úkimet basshysy atalǵan qaǵidanyń 76-tarmaǵyna sáikes júrgizilgen monitoring qorytyndylary boiynsha ýákiletti organ bilim berý uiymdary talap etpegen oqýlyqtardy, oqý-ádistemelik keshenderdi jáne oqý-ádistemelik quraldardy paidalanýǵa usynylǵan oqýlyqtar tizbesinen pysyqtaý, qaita basyp shyǵarý nemese alyp tastaý jóninde sheshim qabyldaityndyǵyn aitady.
«Oqýlyqtarǵa etnomádeni, psiholingvistikalyq jáne terminologiialyq saraptama júrgiziledi. Tehnikalyq jáne grammatikalyq qatelerge avtomattandyrylǵan saraptama engizý, oqýlyqta eleýli kemshilikter anyqtalǵan jaǵdaida ony saraptamadan alyp tastaý josparlanýda. Memlekettik bilim berý uiymdarynyń bilim alýshylary men tárbielenýshilerin oqýlyqtarmen jáne oqý-ádistemelik keshendermen qamtamasyz etý qaǵidalarynyń 24-tarmaǵyna sáikes birinshi oqý jyly ishinde poligrafiialyq aqaý tabylǵan jaǵdaida oqýlyq pen oqý-ádistemelik keshenderdi paidalaný kezinde baspa olardy óz qarajaty esebinen aýystyrýdy júzege asyrady», - dedi Premer-Ministr.
