Semeide ýchaskelik politsiia qyzmetkerleriniń eki qyzmettik kóligin órtep jibergen 65 jastaǵy qala turǵynyna qatysty sot úkimi shyqty, dep habarlaidy ult.kz.
Is materialdaryna sáikes, oqiǵa biylǵy 25 qańtarda bolǵan. Sol kúni er adam garajynda syra ishkennen keiin úiine qaityp kele jatqanda ony ýchaskelik politsiia inspektorlary toqtatqan. Tártip saqshylary ony politsiianyń tirek pýnktine jetkizip, ákimshilik hattama toltyrǵan soń úiine jibergen.
Alaida osydan keiin zeinetker politsiia qyzmetkerlerinen kek alýdy uiǵaryp, garajynan benzin quiylǵan kanistrany alyp kelgen. Keiin tirek pýnktiniń janyna kelip, ýchaskelik inspektorlarǵa tiesili Changan CS55 Plus jáne Chevrolet Cobalt avtokólikterin órtep jibergen.
Kúdikti oqiǵa ornynan qashyp úlgermegen. Politseilerdiń biri ony qýyp jetip, oqiǵa ornynda ustaǵan.
Sot otyrysynda er adam kinásin tolyq moiyndap, ákimshilik jaýapkershilikke tartylǵannan keiin ashýǵa boi aldyryp, politsiia qyzmetkerlerin osylai «jazalamaq» bolǵanyn aitty.
Óz kezeginde politseiler er adamdy masań kúidiń belgileri baiqalǵandyqtan toqtatqanyn, zań talaptaryna sáikes ákimshilik hattama rásimdep, keiin týystarynyń ótinishi boiynsha úiine jibergenderin málimdedi.
Sot ony Qazaqstan Respýblikasy Qylmystyq kodeksiniń 202-babynyń 2-bóligi («Bótenniń múlkin qasaqana joiý nemese búldirý») boiynsha kináli dep tanyp, 2 jyl 3 ai merzimge bas bostandyǵyn shekteý jazasyn taǵaiyndady. Ol osy merzim ishinde probatsiialyq baqylaýda bolady.
Sonymen qatar sot jábirlenýshilerge keltirilgen 9,8 million teńge materialdyq shyǵyndy óteýdi mindettedi. Sottalýshy bul qarajatty zeinetaqysynan óteitinin málimdegen.
