QR Energetika ministri Qanat Bozymbaev 2017 jylǵy 1 qarashada «QazMunaiGaz» UK» AQ-nyń munaidy tasymaldaý, qaita óńdeý jáne marketing boiynsha atqarýshy vitse-prezidentiniń mindetin atqarýshy Daniiar Tiesovtiń jáne «PMHZ» JShS bas direktory Shýhrat Danbaidyń qatysýymen Pavlodar munai-himiia zaýytyn jańǵyrtý barysy máselesi boiynsha jumys keńesin ótkizdi, dep habarlaidy "Ult aqparat" ministrliktiń baspasóz qyzmetine silteme jasap.
«PMHZ» JShS-da jańǵyrtýdy aiaqtaý jáne joǵary oktandy benzin men dizel otynyn shyǵarý úshin qajetti qondyrǵylardy iske qosý merzimderi boiynsha artta qalýshylyq belgili boldy.
Jańǵyrtýdy aiaqtaý merzimi «PMHZ» JShS úshin 26 qazan, al Atyraý munai óńdeý zaýyty úshin 16 qyrkúiek belgilengen bolatyn. Alaida «QazMunaiGaz» UK» AQ merzimderdi aǵymdaǵy jyldyń jeltoqsan aiynyń birinshi jartysyna aýystyrdy.
D. Tiesov pen Sh. Danbaidyń aqparatyn tyńdap, ministr jaqyn arada joǵary oktandy benzinmen jáne dizel otynymen ishki naryqty qamtamasyz etý boiynsha shuǵyl sharalar qabyldaýdy tapsyrdy.
Atap aitqanda, jekelegen qondyrǵylarda aqaýlardyń týyndaýy týraly usynylǵan derekterdiń negizinde Q. Bozymbaev munai ónimderin óndirý qondyrǵylaryn ornatý merzimderi oryndalmaýy múmkin ekendigin eskertti.
Keńes qorytyndysy boiynsha Ministr 8 qarashaǵa deiingi merzimde joǵary oktandy benzindi shyǵarý qondyrǵylaryn jáne qysqa merzimde dizel otynyn shyǵarý qondyrǵylaryn iske qosý qajet ekendigin atap ótti.
Bul rette, «PMHZ» JShS-ny jańǵyrtýdy aiaqtaýdyń belgilengen merzimderi saqtalmaǵan jaǵdaida, Ministr top-menedjerlerdi atqaratyn qyzmetterinen bosatý týraly usynys engizetin bolady.
Pavlodar jáne Atyraý MÓZ-derine Ministr obektilerdi jańǵyrtýdy sozý táýekelderin anyqtaý úshin Ministrliktiń komissiiasyn jiberýdi tapsyrdy.
