QR Parlament Májilisiniń depýtaty Artýr Platonov eldegi «qos bilik» qaýesetine qatysty pikir bildirdi, dep habarlaidy "Ult aqparat".
«Qos bilik degen ne? Bul jaǵdai bir adam eldi bir jaqqa, al ekinshisi basqa jaqqa tartqan kezde oryn alady. Eger de Qasym-Jomart Kemelulynyń sailaýaldy uranyn eske alsaq, onda birinshi pýnkt sabaqtastyqqa qatysty. Biz saiasatta barlyq strategiialyq ári áleýmettik baǵdarlamalarda júieli múltiksiz baǵytty kórip turmyz. Iaǵni syrtqy jáne ishki saiasatqa, adamdar ál-aýqatynyń ary qarai ósimine qatysty kózqarasta tolyqtai yntymaq men birlik qalyptasqan. Bul óz kezeginde saiasattyń negizi», - dedi A. Platonov Parlament Májilisinde tilshiler saýalyna jaýap bere otyryp.
Onyń paiymynsha, bilik tranziti – ol kez kelgen memleket úshin mazasyz kúi keshtiretin sát.
«Álemde dál osy sátte kúrdeli ári boljap aitýǵa bolmaityn oqiǵalar bolyp jatqanyn kórip júrmyz. Bul turǵyda qoǵamnyń jikke bólinýi men qaqtyǵys jaǵdaiynyń týyndaýy, sondai-aq kei kezderde eldiń tutastyǵynan, táýelsizdiginen aiyrylýy sekildi qiyn ahýal oryn alady. Sondyqtan da Elbasy Nursultan Ábishuly Nazarbaev usynǵan beibit ári salmaqty bilik tranziti kóbisi úshin úlgi bolarlyq qubylys. Atap aitqanda, búginde osy modeldi sarapshylar zerttep jatyr. Kez kelgen memleket úshin jaýapty jáne tarihi osy sátte tiisti saiasatty júrgizý mańyzdy. Memlekettegi birlik pen yntymaq, sondai-aq el halqynyń múddesi úshin táýelsiz saiasattyń júrgizilýi keibireýlerine unamaýy múmkin», - dedi depýtat.
