Ekologiia, geologiia jáne tabiǵi resýrstar vitse-ministri Ahmetjan Pirimqulov ekologiialyq tólemderden túsetin qarajat qandai maqsatqa jumsalýy kerektigin túsindirdi, dep habarlaidy QazAqparat.
«Mańyzdy máseleniń taǵy bir tarmaǵy – ekologiiaǵa biýdjet qarajatyn shyǵyndaý máselesi. Halyq pen biznes ókilderi «kásiporyndardyń emissiia úshin jergilikti biýdjetke tólep jatqan qarajaty qaida ketip jatyr, óńirde ekologiialyq aýhaldy jaqsartý úshin ne jasalady?» degen máseleni jii kóteredi. Statistika kórsetip otyrǵandai, aimaqtar ekologiialyq tólemnen jinalǵan qarajattyń ortasha eseppen 40 paiyzyn ǵana ekologiiaǵa jumsaidy. Keibir óńirde bul kórsetkish tipti 5 paiyzǵa da jetpeidi. Sol sebepti biz bul qarajattyń bári de ekologiiaǵa, qorshaǵan ortany qorǵaýǵa jumsalýy kerektigi týraly normany (Ekologiialyq kodeks jobasyna) engizdik», - dedi Ahmetjan Pirimqulov OKQ-da onlain rejimde ótken baspasóz máslihatynda.
Vitse-ministr naqtyraq aitqanda ekologiialyq tólemderden jinalǵan aqsha kógaldandyrýǵa, saiabaqtar men kárizdik tazalaý qurylymdarynyń qurylysyna, turmystyq qaldyqtar poligonyn qalpyna keltirýge jumsalýy kerektigin jetkizdi.
«2025 jyldan bastap jańa tehnologiialardy óndiriske engizbegen kásiporyndarǵa emissiia úshin salynatyn salyq artady. Osy salyq ta ainalyp kelgende ekologiialyq shyǵyndar úshin jumsalýy tiis. Óz óndirisin jaqsartqysy kelmegender – kóbirek aqsha tóleýi tiis. Al jergilikti atqarýshy organdar bul qarajatty ekologiialyq ahýaldy jaqsartýǵa jumsaýy tiis», - dedi ol.
Vitse-ministr sonymen qatar aýa ziiandy zattardy shyǵaratyn oryndarǵa monitoring pen baqylaý júrgizýdiń avtomattandyrylǵan júiesin engizý normasy mindetti bolýy kerektigin aityp ótti.
«Qoǵam kásiporyndardyń shyǵaryndylary týraly málimetti ashyq bilýi kerek dep esepteimiz. Jalpy elde ekologiialyq belsendilik artyp keledi», - dedi ol.
