Filosofiia (PhD) doktory dárejelerine úmitkerler úshin halyqaralyq reitingtik basylymdarda jariialaný talaby jas ǵalymdardyń akademiialyq jazý deńgeiin joǵarylatýǵa septigin tigizedi. Bul týraly Májilis depýtattarynyń resmi saýalyna orai QR Premer-Ministri Baqytjan Saǵyntaevtyń jaýabynda aitylǵan.
«Qazaqstandyq filosofiia (PhD) doktory diplomdarynyń halyqaralyq bilim berý keńistiginde salystyrymdylyǵy doktoranttar daiarlaýdyń jáne qorǵalatyn dissertatsiialar deńgeiiniń joǵary sapasyn kózdeidi. Bul 2011 jyly doktorantýranyń jańa modelin engizý kezinde Clarivate Analytics derekter bazasynda impakt-faktory bar nemese Scopus bazasyna kiretin sheteldik basylymdarda jariialanym bolý talabynyń maqsatqa sai ekendigin aiqyndap berdi. QR Bilim jáne ǵylym ministriniń 2011 jylǵy 31 naýryzdaǵy № 127 buiryǵymen bekitilgen Dárejeler berý qaǵidalaryna sáikes doktoranttyń jeti jariialanymynyń bireýi halyqaralyq retsenziialanatyn basylymda jariialanýy qajet», - dedi Baqytjan Saǵyntaev.
Bul rette, Úkimet basshysynyń atap ótýinshe, tehnikalyq baǵyttarmen salystyrǵanda doktorantýranyń gýmanitarlyq daiarlyq baǵyttary úshin tańdaý kóbirek - sheteldik jýrnal Clarivate Analytics aqparattyq kompaniiasynyń derekter bazasynda (Web of Science Core Collection) nóldik emes impakt-faktorǵa ie nemese indeksatsiialanatyn bolýy kerek nemese Scopus, JSTOR bazalaryna kirýi qajet.
«2017 jylǵy 581 túlektiń ishinen 406 doktorant nemese shamamen 70% dissertatsiialaryn qorǵady. Olardyń barlyǵy dissertatsiialaryn qorǵaǵanǵa deiin sheteldik maqalalar jariialaǵan. Ýaqytynda qorǵalmaityn doktorlyq dissertatsiialar problemasy JOO-da doktoranttardy daiarlaý sapasy men baqylaý máselesine jatady. Clarivate Analytics jáne Scopus bazasyna kiretin sheteldik basylymdardyń negizgi ólshemsharttary - maqalanyń sapasy men onyń biregeiligi, halyqaralyq nemese jahandyq kózqaras, qorytyndylardyń shynaiylyǵy men obektivtiligi, logikalyq mazmundalǵan dáleldemesi. Sonymen qatar, bazalarda indeksatsiialaný úshin jýrnaldar jariialanymdardyń halyqaralyq sipatyn jáne avtorlardyń keń geografiiasyn kórsetýi tiis. Sheteldik reitingtik basylymdarda jariialaný múmkindigi doktoranttardy daiarlaý baǵytyna táýeldi emes», - dep atap ótedi Úkimet basshysy.
Onyń dereginshe, sońǵy 3 jylda jalpy qorǵaýlar ishinde gýmanitarlyq beiindegi doktoranttar sany 29 paiyzdy quraidy jáne olardyń bárinde talap etiletin sheteldik jariialanym bar. Bul rette, doktorantýranyń bilim berý baǵdarlamasy reitingtik sheteldik basylymdarda dissertatsiialar nátijelerin jariialaý úshin jetkilikti múmkindikter jasaidy. Aitalyq, doktorantýra boiynsha Memlekettik jalpyǵa mindetti bilim berý standartyna sáikes doktorlyq dissertatsiia jónindegi ǵylymi konsýltanttardyń biri bolyp sheteldik ǵalym taǵaiyndalady. Sondai-aq daiarlyq baǵytyna qaramastan barlyq doktoranttar shetelde ǵylymi taǵylymdamadan ótýge tiis. Clarivate Analytics jáne Scopus derekter bazasyndaǵy gýmanitarlyq baǵyttar boiynsha reitingtik jýrnaldardyń sany doktoranttardyń zertteýlerine saikes keletin jýrnaldy tabýǵa jetkilikti. Clarivate Analytics derekter bazasynda impakt-faktory bar jýrnaldardyń 22 paiyzy (1700) áleýmettik ǵylymdarǵa jatqyzylǵan. Scopus bazasynda áleýmettik (gýmanitarlyq) ǵylymdar jáne ómir týraly ǵylymdar boiynsha basylymdar tiisinshe 24 pen 15 paiyzdy quraidy.
«Sonymen birge, doktoranttar men ǵylymi ataqtarǵa úmitkerlerdiń ǵylymi qyzmetiniń nátijelerin jariialaýǵa sapasy joǵarylaý reitingtik jýrnaldardy irikteý úshin Qazaqstan Respýblikasy Prezidenti Ákimshiliginiń tapsyrmasyna sáikes Dárejeler berý qaǵidalaryna jáne Ǵylymi ataqtar (qaýymdastyrylǵan professor (dotsent), professor) berý erejesine bibliometriialyq kórsetkishterdi (Clarivate Analytics kompaniiasynyń Journal Citation Reports deregi boiynsha kvartil jáne Scopus bazasy boiynsha CiteScore protsentil korsetkishi) paidalanýdy kózdeitin ózgerister engizilýde. Osylaisha, filosofiia (PhD) doktory, beiini boiynsha doktor dárejelerine úmitkerler úshin halyqaralyq reitingtik basylymdarda jariialaný talaby jas ǵalymdardyń akademiialyq jazý deńgeiin joǵarylatýǵa, sondai-aq ulttyq gýmanitarlyq ǵylymdy halyqaralyq ǵylymi keńistikte biregei áleýmettik bilim retinde tanymal etýge baǵyttalǵan», - dedi Premer-Ministr.
