"Aleksandr Petrov" pen "Rýslan Boshirov" týraly málimetter jariialanyp ketip, Federaldyq qaýipsizdik qyzmeti (FSB) tergeý bastaǵan soń Reseidiń jabyq málimetter bazasyna kirý qiyndady. Bul týraly The Bell internet basylymy habarlady.
Ishki ister ministrliginiń burynǵy eki qyzmetkeriniń basylymǵa aitýynsha, "Rospasport" bazasyna jáne kásipkerler qyzmetkerler men kontragentterdi tekserý úshin qoldanatyn Federaldyq salyq qyzmetiniń málimetter bazasyna kirý qiyndaǵan. "Buryn bazalardy birge turatyn adamyń nemese tanysyń arqyly paidalanýǵa múmkindik bolsa, qazir barlyǵy iligip ketpeiin dep ýaiymdap otyr" dedi burynǵy politsei. Ekinshi derekkózi barlaý qyzmeti málimetteriniń qoldy bolýy "shekteýdi burynǵydan da kúsheite túsetinin" aitady.
30 qazanda "Rosbalt" agenttigi FSB-daǵy derekkózine silteme jasap, "Petrov" pen "Boshirov" týraly málimetterdiń jariialanýyna kúdikti shekara qyzmeti men Federaldyq salyq qyzmetiniń eki qyzmetkeri ustalǵanyn habarlaǵan.
Qyrkúiektiń basynda Ulybritaniia biligi biylǵy naýryzdyń 4-i kúni Solsberi qalasynda Sergei Skripal men qyzy Iýliiaǵa qarsy júikeni jansyzdandyratyn asa ýly zat qoldanýǵa kúdikti sanalatyn eki er adamnyń beinebaqylaý kamerasy túsirgen fotosýretin jariialaǵan. Politsiia málimdemesinde ol eki adamnyń Ulybritaniia aýmaǵyna "Rýslan Boshirov" jáne "Aleksandr Petrov" degen reseilik azamattarǵa berilgen pasportpen kelgeni aitylǵan.
Bellingcat zertteý toby Aleksandr Petrovtyń shyn aty Aleksandr Mishkin ekenin anyqtaǵan. Zertteý tobynyń málimetinshe, Mishkin áskeri akademiialardyń birinde meditsinalyq bilim alǵan jáne Resei áskeri barlaýynyń qyzmetkeri. Rýslan Boshirovtyń reseilik barlaýshy Anatolii Chepiga ekeni belgili bolǵan.
Al "Petrov" pen "Boshirov" RT telekanalyna ózderiniń "qarapaiym kásipkerler" ekenin, Solsberige "týrist retinde barǵanyn" málimdegen.
Máskeý Sergei men Iýliia Skripalderge jasalǵan qastandyqqa qatysy baryn joqqa shyǵarady. Resei prezidenti Vladimir Pýtin "Petrov" pen "Boshirovty" "qarapaiym adamdar" dep atap, olardyń isinde "eshqandai qylmys joq" dep málimdegen.
