Qazaqstanda taǵy úsh qalanyń ataýyn aýystyrý usynyldy. Bul usynysty «Aq jol» partiiasy tóraǵasy orynbasary, aqyn Qazybek Isa Demokratiialyq kúshterdiń «Qazaqstan-2050» jalpyulttyq koalitsiiasy otyrysynda aitty.
«Endi biz Elbasyǵa elordanyń atyn berýmen birge tarixi sabaqtastyq retinde Petropavl qalasyna kezinde óziniń ordasy turǵan, úsh júzdiń basyn qosqan qazaqtyń uly xany Abylai xannyń atyn, Pavlodar qalasyna qazaqtyń táýelsizdigi úshin kúresken qazaqtyń sońǵy xany Kenesarynyń atyn, kezinde Alash qalasy atanǵan Semeige qazaq tarixynda ǵana emes, Orta Aziiada tuńǵysh saiasi partiia qurǵan Alashorda úkimetiniń tóraǵasy Álixan Bókeixannyń atyn berip, jaqsy jalǵastyryp alyp ketýimiz kerek» deidi Qazybek Isa.
«Aq jol» partiiasy tóraǵasy orynbasary bul bastamany tarixi tamyrymyzdyń tereńdigin, saiasatymyzdyń kemeldigin kóreseter is bolady dep esepteidi.
«Máslihattarymyz da, Parlamentimiz de qala atyn aýystyrýdyń ǵaryshtyq jyldamdyǵyn kórsetip otyr, endeshe 28 jyldan beri nege sozyp kelgenbiz bul qalalardyń atyn aýystyrýdy?..», dep atap ótti ol.
Aita ketsek, Memleket basshysy Qasym-Jomart Toqaevtyń Jarlyǵymen Qazaqstan Respýblikasynyń astanasy – Astana qalasy Nur-Sultan qalasy dep qaita atalǵan bolatyn.
