Petropavldaǵy aýyr mashina jasaý zaýyty jumysshylaryna 2 aiǵa jýyq eńbekaqy tólemegen. Kásiporynnyń bereshegi 86 mln teńgege jetti, dep habarlaidy "Ult aqparat".
«Petropavl aýyr mashina jasaý zaýyty» AQ baspasóz qyzmetiniń málimetinshe, áleýmettik aýdarym, meditsinalyq saqtandyrý men zeinetaqy jarnasyn tóleý jáne jumystan shyqqan qyzmetkerlerdiń eńbekaqysyn qosqanda qaryz 86 mln teńgeni quraidy. Bul – aqpannyń jáne naýryzdyń jarty aiynyń bereshegi.
«Kásiporyn iri tenderdi utyp alyp, sol boiynsha jumys isteýi kerek edi. Tehnikalyq jaǵdailarǵa bailanysty ol qaita-qaita keiinge qaldyryldy. 14 sáýir kúni tender oinatyldy. Biz tiisti qujattarǵa qol qoiyp, endi qarajattyń túsýin kútip otyrmyz. Alatyn soma – 500 mln teńgeden asady. Iaǵni, sáýir aiynyń sońyna deiin eńbekaqy boiynsha qaryz jabylady. Al sáýir aiynyń eńbekaqysyn jumysshylar zań boiynsha 10 mamyrǵa deiin alady», - deidi «PAMJZ» AQ baspasóz hatshysy Elena Stadnik.
Zaýyt ókiliniń aitýynsha, qazir kásiporynda 700-ge jýyq adam jumys isteidi. Jumysshylardyń bir ailyq eńbekaqy kólemi shamamen 65-70 mln teńge.
«2020 jyldan bastap jaǵdaiymyz kúrdeli. Pandemiia bastalǵaly munai óndirýshi kompaniialar óndiristi azaitty, saldarynan bizdiń ónimge suranys kemidi. Budan basqa shekaralardyń jabylýyna bailanysty shetelden material kirgizý qiyndyq týdyrdy. Biz barlyq metalldy Reseiden jetkizemiz, óitkeni elimizde óz óndirisimiz joq. Kei qosalqy bólshekter keden beketinde 2-3 ailap turyp qaldy. Bul da óndiriske áser etti. Ol kezde de eki ai boiynsha eńbekaqy qaryzy boldy. Biraq máseleni ýshyqtyrmai sheshe aldyq», - deidi Elena Stadnik.
Qazirgi tańda «PAMJZ» AQ Qazaqstannyń munai óndirýshi kompaniialaryna qajet qondyrǵylar shyǵarady. Budan basqa munai óńdeý kásiporyndaryna qajet qondyrǵylardy, servistik qyzmet kórsetetin arnaiy tehnikany jáne temirjoldy jóndeýge kerek qondyrǵylardy jasaidy.
«2019 jyly TMD elderi ishinde birinshi bolyp bizdiń zaýyt termos vagondardy qurastyra bastady. Biz óndiristi tolyq jolǵa qoidyq, sáikestik sertifikatyn aldyq. Qazirgi ýaqytta konstrýktorlyq qujattardyń iesi - «Cool Infinity» JShS, olar bul isti damytyp jatyr, biz vagondarǵa qajetti bólshekterdi shyǵaramyz.
Kásiporyn birneshe ret jańǵyrtyldy. Sońǵy ret respýblikalyq biýdjetten 4,4 mlrd teńge bólinip, 2018-2020 jyldar aralyǵynda 39 zamanaýi qondyrǵy jetkizildi. Taǵy da pandemiianyń saldarynan Germaniiadan maman kele almai jatqandyqtan, olardy iske qosý kesheýildep jatyr. Biraq munyń bári – ýaqytsha qiyndyqtar», - deidi baspasóz hatshysy.
SQO memlekettik eńbek inspektsiiasy basqarmasy bul jaǵdaiǵa qanyq.
«Jyl basynda eńbek inspektsiiasy basqarmasy zaýytta profilaktikalyq baqylaý júrgizdi, biraq qańtar aiynda eńbekaqy boiynsha qaryz anyqtalǵan joq. Keiin jumysshylardyń eńbekaqy ala almai júrgendigi jaiynda aqparat kei BAQ-ta jariialandy. Biraq zaýyt jumysshylary bizge aryzdanǵan joq. Sol sebepti teksere de almaimyz. Biraq jaǵdai bizge tanys. Sol sebepti naýryz aiynda eńbek daýlaryn monitoringileý jumys tobynyń otyrysynda bul másele qaraldy. 13 sáýirde oblys ákimi tóraǵalyq etken úsh jaqty komissiiaǵa «PAMJZ» AQ bas direktory shaqyrylyp, ol jaǵdaiǵa túsinikteme berdi. Aitýynsha, jumysshylarǵa aqpan aiyna tolyq jáne naýryz aiynyń jartysyna eńbekaqy boiynsha bereshek bar», - deidi SQO memlekettik eńbek inspektsiiasy basqarmasy basshysynyń orynbasary Miras Sabaǵanov.
Qazir eńbek inspektorlary jaǵdaidy baqylaýda ustap, kúndelikti monitoring jasap otyr.
«Sońǵy málimet boiynsha, tender ótti, mamyr aiyna deiin qaryz óteledi. Eger de ýáde oryndalmasa, zaýyt jumysshylary bizge ótinish berýge quqyly. Sony negizge ala otyra jumys berýshige qatysty tekseristi bastaimyz. Uiǵarym beremiz. Aiyppul salamyz. Jumysshylardyń eńbekaqysy sot oryndaýshylardyń kómegimen zańdy túrde óndirilip alynady», - deidi Miras Sabaǵanov.
