Petropavlda kólik júrgizýshisi júrginshiler ótkelinen ótip bara jatqan anasy men qyzyn abaisyzda qaǵyp ketti, dep habarlaidy QazAqparat.
Oqys oqiǵa jaiynda áleýmettik jelide jariia boldy.
Petropavl qalalyq politsiia basqarmasynyń málimetinshe, jol-kólik oqiǵasy búgin saǵat 14.00 shamasynda bolǵan. Ýálihanov kóshesindegi júrginshiler ótkeli arqyly joldy kesip ótip bara jatqan eki adamdy Audi 100 avtokóliginiń 52 jastaǵy júrgizýshisi qaǵyp ketken.
Oqiǵa kýágerleri birden jedel járdem qyzmetin shaqyrdy. Zardap shekkender 32 jastaǵy áiel men onyń 8 jasar qyzy. Olarǵa emdeý mekemesinde meditsinalyq kómek kórsetilip, keiin úilerine jiberildi.
Jol-kólik oqiǵasyna bailanysty ákimshilik material jinalyp, ákimshilik politsiia bólimine protsessýaldyq sheshim qabyldaý úshin berildi.
