Petropavldaǵy QR Ulttyq ulany Áskeri intitýtynyń 62 kýrsanty ózderin jaisyz sezinip, meditsinalyq kómekke júgingen. Oqiǵaǵa bailanysty joǵary oqý ornynda qyzmettik tekseris júrip jatyr, dep habarlaidy "Ult aqparat".
Áskeri intitýttyń baspasóz qyzmetinen málim etkendei, oqiǵa 25 qarasha kúni bolǵan. Joǵary oqý ornynyń 62 kýrsanty túngi saǵat 01.30-dan bastap, tańǵy saǵat 10.00-ge deiin meditsinalyq kómekke júgingen. Jigitterdiń ishi ótip, qusyp, ystyǵy kóterilgen.
Sol kúni diagnozdy anyqtaý úshin tórt kýrsant Petropavldaǵy №1 qalalyq aýrýhananyń infektsiia bólimshesine jatqyzyldy. Dárigerler olarǵa «astan ýlaný» (taǵamdyq toksikoinfektsiia) diagnozyn qoiǵan. Qalǵan kýrsanttar meditsinalyq kómek alǵannan keiin oqýlaryn jalǵastyrǵan.
Áskeri institýt ókilderiniń sózine qaraǵanda, ashanada «SANZHELI» JShS qyzmet kórsetedi. Epidemiologiialyq tekseris qorytyndysy jastardyń oqý ornynyń ashanasynda ýlanbaǵanyn rastady.
«SQO Taýarlar men kórsetiletin qyzmetterdiń sapasy men qaýipsizdigin baqylaý departamentiniń bakteriologiialyq zerthanasynda institýt ashanasynan alynǵan tamaqtardyń, sýdyń, ydystardyń ústińgi qabattarynyń synamasy zertteldi. Ashananyń 21 qyzmetkeri men 300 kýrsant tekserilip, olardan infektsiia qozdyrǵyshy tabylmady. 328 adam, sonyń ishinde ashana qyzmetkerleri ishek mikroflorasyna tekserildi. Tek eki kýrsantta ǵana enterovirýs anyqtaldy», - delingen resmi aqparatta.
Mamandardyń aitýynsha, enterovirýs ishekte kezdesetin infektsiia. Aýrý adammen bailanysta bolǵandardyń 80% dertti juqtyrady. Ol – jeke bas gigienasyn saqtamaǵan jaǵdaida jáne aýa arqyly taralady. Derttiń belgileri astan ýlanǵanmen birdei. Iaǵni adamnyń ishi aýyrady, qusady, ystyǵy kóterilip, tábeti qashady.
Málim bolǵandai, 24 qarasha demalys kúni bolǵandyqtan 2,3 jáne 4-kýrs kýrsanttary jospar boiynsha Áskeri institýttyń avtobýstarymen kinoteatrǵa barǵan. Meditsinalyq kómekke júgingen 62 kýrsanttyń 12-si sol kúni qalaǵa demalysqa jiberilgen. Qazir kýrsanttardyń qaida jáne qandai astan ýlanǵany anyqtalyp jatyr. Joǵary oqý ornynda epidemiiaǵa qarsy is-sharalar tolyq júrgizildi. Sondai-aq aýrýhanaǵa túsken kýrsanttar da jazylyp, oqýlaryna kiristi.
Áskeri politsiia oqiǵanyń mán-jaiyn anyqtaýda, oqý orny da qyzmettik tekseris júrgizýde.
