Petropavldaǵy «Kópes Iangýrazovtyń úii» nemese halyq arasynda «Qalyńdyq úii» atalyp ketken biregei sáýlet eskertkishi memleket menshigine qaitarylyp, endi qujattary jónge kelisimen kúrdeli jóndeý jumystary bastalady, dep habarlaidy QazAqparat.
Petropavldaǵy «Kópes Iangýzarovtyń úii» byltyr qarasha aiynda memleket menshigine ótti.
Qazaqstan musylmandary dini basqarmasynyń oblystyq filialy balansynda turǵan kóne ǵimaratty jergilikti bilik satyp aldy.
Munda tarihi-mádeni murany qorǵaý jáne paidalaný ortalyǵy ornalaspaq.
2013 jyly «Mádeni mura» memlekettik baǵdarlamasy aiasynda nysandy qaita qalpyna keltirýge respýblika qazynasynan 60 mln astam teńge jumsaldy. Bul qarajatqa shatyry aýystyrylyp, úidiń qasbeti, ishi jónge keltirildi.
Alaida respýblikalyq mańyzy bar eskertkishterdiń qataryna engen ǵimarattyń búgingi jaǵdaiy kóńil kónshitpeidi.
«Halyq «Qalyńdyq úii» atap ketken nysannyń óz tarihy men biregei arhitektýralyq kelbeti bar. Ǵimarat erekshe salynǵan, modern stilinde turǵyzylǵan. Bizge jetken málimet boiynsha italiialyq sáýletshiniń qatysýymen salynǵan. Kóne ǵimarattyń qabyrǵalary biik, emen esikteri men úlken terezeleri saqtalǵan. Iran plitkalary ornynda tur. Qazir qujattary durystalǵasyn ǵimarattyq qasbetin, ishin, qabyrǵalaryn, shatyryn, eń bastysy káriz júiesin qalpyna keltirý josparda bar. Osy jyly bul jumystardy atqaramyz dep otyrmyz», - deidi tarihi-mádeni murany qorǵaý boiynsha bólimniń meńgerýshisi Janat Baimúsenov.
«Qalyńdyq úii» týraly el arasynda ańyz kóp.
Sonyń biri - jergilikti kópes Halit Iangýrazov Sankt-Peterbýrgte issaparmen júrip ótip, bir boijetkenge ǵashyq bolady. Ol sulýǵa sezimin bildirip, úilenbek nietin jetkizedi.
Baidyń sholjań ósken erke qyzy Petropavlda ákesinikindei úi salsa ǵana saýdagerge kúieýge shyǵatynyn aitady.
Iangýrazov qyzdyń talabyn oryndaý úshin Italiiadan arnaiy sáýletshi aldyryp, ásem ǵimaratty salǵyzady.
Ańyzdardyń birinde Halittiń úilený toiynan úsh kún buryn qaitys bolǵandyǵy aitylsa, endi birinde oqiǵa sátti aiaqtalyp, erli-zaiyptylar uzaq jáne baqytty ómir súrgen eken.
Taǵy bir nusqasynda saýdager úidi salý úshin bar jiǵan-tergenin jumsap, qalǵan ǵumyryn kedeilikte ótkizgendigi aitylady.
Ǵimarat tolyǵymen aǵashtan salynǵanymen syrtynan tastan qalanǵan siiaqty kórinedi. Keńes zamanynda kópestiń úii Petropavl ákimshiligine berildi.
Bul ǵimaratta Sábit Muqanov ta eńbek etken.
1960-shy jyldardan bastap oblystyq qarjy bólimi keiin taǵy birqatar memlekettik mekemeler ornalasty, bir jyldary munda medrese de ashyldy.
1982 jyldan bastap nysan sáýlet óneriniń eskertkishi qataryna engizilgen.
