Petropavldaǵy Jumysshy kentine aparatyn kópirdi jóndeý barysynda ne sebepti karton qoldanylǵanyn búgin mamandar túsindirdi. Qurylysshylardyń «tehnologiiasy» áleýmettik jelide kópshiliktiń talqysyna túsken edi, dep habarlaidy QazAqparat.
Petropavl men Jumysshy kentin qosatyn negizgi kópirlerdiń biri eki aptadan beri jóndelip jatyr. Iaǵni kópir 28 qazannan beri avtomobil qozǵalysyna jabyq. Qalanyń ortalyǵyna kúnde qatynaityn turǵyndarǵa bul biraz qiyndyq ákeldi. Mamandardyń aitýynsha, kópir 2014 jyly kúrdeli jóndelgen, osy maqsatqa 500 mln teńge jumsalǵan. Ýaqyt óte joldyń beton plitalary sógilgen. Ony ortasha jóndeýge 21 mln teńge bólindi.
«Jumystar aiaqtalýǵa jaqyn. 5 sm asfalt-beton qosyndysyn tósedik. Endi beton plitalarynyń arasy qaita ashylyp, jezden jasalǵan kompensator qoiylady. Keiin ústine taǵy da asfalt tóseledi. Bul tehnologiia kóptegen elderde qoldanylady. Olai etpegen jaǵdaida eki betonnyń qosyndysy túzý bolmai, tolqyndanyp turady», - deidi joba avtory Sergei Chýrilov.
Jaqynda áleýmettik jelide kópirdiń qurylysyna qatysty beinejazba paida boldy. Qurylysshylar nysandy jóndeý barysynda karton qaǵazdy, taqtailardy qoldanǵan. Bul ádis kópshiliktiń synyna qalyp, ájýaǵa ainaldy.
«Ol karton, eski-qusqy tesikterdi jabý úshin ýaqytsha qoldandyq. Óitkeni kópirdiń astynan temirjol ótedi. Qurylys materialy temirjolǵa túsip, qaýip týdyrýy múmkin», - deidi Sergei Chýrilov.
Petropavl qalalyq ákimdik ókilderiniń aitýynsha, kópirdegi jóndeý jumystary bir aptanyń ishinde aiaqtalmaq.
«Kópirge jóndeý júrgizý úshin jaz ýaqytynda eki ret konkýrs ótkizdik, nátije bolmady. Sondyqtan qyrkúiek aiynda «Magistral-SK» JShS kelisimshartqa otyryp, Ońtústik-Oral temirjolymen tiisti kelisim jasalǵannan keiin jumystar bastaldy. Kelesi aptada kópir paidalanýǵa beriledi», - deidi Petropavl qalalyq turǵyn úi-kommýnaldyq sharýashylyǵy, jolaýshylar kóligi jáne avtomobil joldary bóliminiń baspasóz hatshysy Ásem Aitýlova.
