Petropavlda on jetinshi balasy dúniege kelgen erekshe otbasy turady, dep habarlaidy Sputnik Qazaqstan.
"Shildede bizdiń otbasymyzda on jetinshi náreste – ul bala jaryq dúnie esigin ashty. Oǵan David degen esim berdik", - dedi otaǵasy Pavel Kýltyshev agenttik tilshisine telefon arqyly.
Bul kópbalaly otbasyndaǵy onynshy ul, jeti qyz bar.
Taǵy bir jaqsy jańalyq – úlken qyzy Inna turmysqa shyqty.
Baqyt qushaǵynda
Pavel men Tatiana 2000 jyly úilengen. Olar shirkeýde tanysqan. Sol shaqta Pavel 22, Tatiana 19 jasta bolǵan. Otbasynda qansha bala bolatynyn talqylamapty. Qudai qansha bala berse, sonsha bala ósiremiz degendi ustanyp kelgen.
Tatiana tuńǵyshyn 20 jasynda bosanǵan. Sodan keiin jyl saiyn otbasynda jaqsy jańalyq bolyp turǵan.
Qazir tuńǵysh perzent Inna 20 jasta, Lena 18-de, al Kýltyshevter otbasyndaǵy alǵashqy ul Vladimir 17, Evgenii 16 jasta. Olar ákelerine bizneste septesip, qolushyn sozyp keledi.
Jeke kásipker retinde jumys isteitin Pavel on saýsaǵynan óner tamǵan azamat: ol dánekerleý ádisi arqyly túrli pishindegi qaqpa, darbaza, kúrkeler daiyndap, júk tasymaldaý, avtokólik jóndeý, jazda jer jyrtý jáne shóp orýmen de ainalysady.
Irina 15, Dmitrii 14, Pavel men Tatiana 12 jasta. Odan soń toǵyz jasar Andrei, segiz jasar Leonid, jeti jasar Sergei bar.
2016 jyly Kýltyshevter otbasynda on ekinshi perzent dúniege kelgen kezde búkil Qazaqstanǵa tanymal boldy. Bári olar jaily siýjet túsirip, maqala jazdy.
Budan soń jurt birtindep otbasy jaily umyta bastady. Osy ýaqyt ishinde Kýltyshevtar januiasy tórt jasar Alena, úsh jasar Diana, eki jasar Liýbovpen tolyqty. Ótken jyldyń maýsymynda kishkentai Vlad esimdi ul týylsa, biyl shildede otbasyndaǵy ázirshe kenje perzent David dúniege keldi.
Bala – úlken baqyt
Paveldiń ózi de segiz bala tárbielengen kópbalaly otbasynan shyqqan. Qazir ol baýyrlarymen tatý jáne biraz aǵa-ápkesi jaqyn jerde turady. Paveldiń baýyrlary da kópbalaly otbasylar qatarynda.
Al Tatiana qarapaiym otbasynda ósken. Onyń eki baýyry bar. Áitse de Tatiana da balalar ómirdegi eń úlken baqyt dep sanaidy. Ol bosanatyn ýaqytqa az qalǵan kezde ǵana emhanaǵa esepke turady eken. Júktilik kezinde ýltradybystyq zertteýden ótýge ýaqyt joq. Sol sebepti osy joly da dúniege keletin shaqalaqtyń jynysyn sońǵy sátke deiin eshkim bilmegen.
Kýltyshevter otbasy óte tatý, bir-birine kómektesip, úlkenderi kishilerge qamqorlyq tanytyp, as daiyndap, kir jýý, kiim útikteý syndy turmys tirshiligin barlyǵy jumylyp atqarady. Otbasynda árqaisysynyń áýes isine de kóńil bóledi. Mysaly, úlken segiz bala mýzykalyq aspapta oinaidy. Balalar baqshaǵa barmaidy. Olardyń óz úileri de bóbekjaiǵa ainalǵan. Jasy úlken balalardyń ózderinen kishilerge oqý-jazýdy úiretedi.
"Balalardy shatastyryp almaisyz ba?" degen suraqqa Pavel kúlip jaýap berdi.
"Joq, barlyǵynyń esimin bilemin, shataspaimyn. Biraq týǵan kúni men jasy neshede ekeninen biraz shatasýym múmkin. Áielim menen jaqsy biledi", - deidi ol.
Pavel Kýltyshev kópbalaly otbasylardyń barlyǵynyń turmysy tómen degen stereotipti pikir estigenin aitady.
"Buryndary otbasynda kóp balanyń bolýy qalypty jaǵdai edi, al qazir ár januiada bir-eki bala ǵana bar. Alaida biz ata-ájelerimizge qaraǵanda áldeqaida jaqsy jaǵdaida ómir súrip jatyrmyz. Mundai baqyttan qalai bas tartýǵa bolatynyn túsinbeimin! Men qýana-qýana úige qaitamyn. Tabaldyryqtan attaǵan sátimde-aq balalar betimnen súiip, qushaqtai jóneledi. Tipti kiim sheship úlgermeimin. Balalarym tárbieli, meiirimdi, erke emes. Bizdiń otbasymyzben tanys kez kelgen adamnan surańyz, muny rastaidy. Bala kóp bolǵan saiyn olar bir-birimen tatý bolyp, ár zatty bólisýdi úirenip ósedi", - deidi Pavel.
Rasynda da Kýltyshevtar otbasynda balalardyń barlyǵy salmaqty, symbatty ári tap-tuinaqtai. Barlyǵynyń kiimi bútin, bilim alady jáne súiikti isimen ainalysady.
"Úlken januiany asyraý ońai dep aita almaimyn. Túrli ýaiym bar. Biraq qudai bizdi nazarynan tys qaldyryp jatqan joq", - dep qorytty otaǵasy.
Pavel osydan 20 jyl buryn satyp alǵan úidi tolyǵymen qaita jóndep shyqty. Otbasy ulǵaiǵan saiyn úi kólemi de úlkeie tústi. Pavel ekinshi qabatty kóterip, qorshaýdyń ornyn aýystyrǵan jáne aýmaqty barynsha keńeitken. Áitse de Kýltyshevtar úlken otbasy erkin siiatyn úlken úidi armandaidy.
