Petropavl qalalyq mádeniet úiiniń shatyry qulady, zardap shekkender joq, dep habarlaidy QazAqparat.
Oqys oqiǵa keshe 24 aqpan kúni saǵat 20.10 minýt ketkende bolǵan. Petropavldaǵy Sátpaev kóshesi, 37 meken-jaiynda ornalasqan qalalyq mádeniet úiiniń shatyry opyrylyp qulady.
SQO ákimdiginiń mádeniet, tilderdi damytý jáne muraǵat isi basqarmasynyń málimetinshe, ǵimarat eski, qurylymdardyń tozýy saldarynan tóbesi opyrylyp, kórermen zalynyń ústindegi shatyrdyń tirek arqalyqtary synǵan. Búlingen aýdan shamamen 500 m2 alyp jatyr. Zardap shekkender joq.
«2021 jylǵy maýsymda nysan shatyrynyń jai-kúiin tehnikalyq tekserý barysynda kontsert zalynyń ústindegi shatyrdyń apattyq jaǵdaida turǵany týraly tehnikalyq qorytyndy berildi. Tiisti saraptamadan ótkizilgennen keiin, shatyrdy kúrdeli jóndeýge byltyr 30 qarasha jobalyq-smetalyq qujattama ázirlendi. Qazirgi ýaqytta Petropavl qalasynyń ákimdigi, SQO ákimdiginiń mádeniet, tilderdi damytý jáne muraǵat isi basqarmasy máslihattyń kezekti sessiiasyna kúrdeli jóndeý júrgizý úshin qarajat bólý týraly ótinish berdi», - delingen basqarma taratqan habarlamada.
Petropavl qalalyq mádeniet úiinde 27 shyǵarmashylyq ujym - 548 adam eńbek etedi. Ótken jyldyń maýsym aiynan bastap osy ýaqytqa deiin shyǵarmashylyq ujymdar jalǵa beriletin ǵimarattarda jumys istep jatyr.
«Nysan ótken jyldyń qarasha aiynan beri apattyq jaǵdaiǵa bailanysty jabyq turǵan. Bul nysan kimniń balansynda tur, sol, iaǵni ákimdik jaýap beredi. Bul jerde zardap shekkender, qaza tapqandar bolmaǵandyqtan, bizdiń quziretimizge kirmeidi», - deidi SQO TJD mamandary.
Mádeniet úii ǵimaraty 1930 jyldary salynǵan. Nysan 10 jyl buryn kúrdeli jóndeýden ótken. Endi kóne ǵimarat birtindep buzylyp jatyr. Byltyr qazan aiynyń sońynda nysannyń tóbesiniń bir bóligi qulaǵan edi.
