© Sputnik / Vladislav Vodnev
Petropavlda imamnan suhbat alǵan jýrnalist aiyppul tóleidi, dep habarlaidy Sputnik Qazaqstan agenttigi.
Kúni keshe Petropavl qalasynyń mamandandyrylǵan ákimshilik soty jýrnalist jáne qalalyq máslihat depýtaty Rýfiia Mustafinaǵa "Dini qyzmet jáne dini birlestikter týraly zańnamany buzý" baby boiynsha 153 150 teńge (50 AEK) kóleminde aiyppul salý týraly sheshim shyǵardy.
"Maǵan dini material taratqanym úshin aiyppul salyndy. Óz basylymymnyń saitynda jáne áleýmettik jelilerinde jariialaǵan bas imammen suhbatty sot dini material dep tanydy. Suhbatta bas imam Qurban Ait meiramy týraly, osy merekeniń dástúrleri týraly aitady. Sondai-aq meniń qolymda eki saraptama bar, qujat qorytyndysynda suhbatty taratýǵa kedergi keltiretin mazmun joq ekeni jazylǵan", - dedi Rýfiia Mustafina.
Sonymen qatar ol ekinshi sot otyrysyna din isteri basqarmasynyń mamany shaqyrylǵanyn, ol imamnan ruqsaty bolsa, mundai materialdy taratýǵa bolatynyn sotqa túsindirdi.
"Maǵan bul suhbatty imamnyń ózi berdi. Suhbat jariialanǵan shilde aiynan beri oǵan eshkim narazylyq bildirmedi. Onyń ústine, bul materialdy jelide qalalyq ishki saiasat bóliminiń basshysy men qala ákiminiń baspasóz qyzmeti de bólisken", – dep tańǵaldy jýrnalist.
Ol istiń qanshalyqty ádil ótkenine kúmándanatyndyqtan, apelliatsiialyq shaǵym túsirýdi, sondai-aq sýdianyń ústinen shaǵym jazýdy josparlap otyrǵanyn aitty.
"Sot júiesi óte kúrdeli, ony qarapaiym halyqtyń túsinýi qiyn. Al eger normalar, erejeler men reglamentter naqty jazylmasa, "dini materialdardy taratý" degen uǵymdy qalaýynsha qoldaný ońai. Din isteri basqarmasyna suraq kóp. Imamnyń túsindirmesi nege dini material bolýy kerek? Onda nege mektep oqýshylary dintaný sabaǵyn oqyp jatyr?", - deidi Rýfiia Mustafina.
Oblystyq politsiia departamenti ekstremizmge qarsy kúres basqarmasynyń basshysy Rýslan Jarasbaev qazan aiynyń sońynda oblysta jyl basynan beri dini mazmundaǵy materialdardy zańsyz taratýdyń 22 faktisi anyqtalǵanyn habarlady.
"Dini materialdardy tek ǵibadat oryndarynda, rýhani (dini) bilim berý uiymdarynda taratýǵa bolady. Kásipkerler bul materialdardy taratý úshin jergilikti atqarýshy organdardan ruqsat alýy kerek. Sondai-aq din máselesinde tek resmi aqparat kózine súienýge, zańdy bilip, saqtaýǵa shaqyramyz", - dedi Rýslan Jarasbaev.
Osy sot qaraýyndaǵy isten keiin kóp jýrnalist dini merekeler týraly materialdar jáne dinge qatysty basqa da aqparattar daiyndaýǵa alańdaityny anyq.
"Depýtat retinde men bul máseleni anyqtaýǵa mindettimin. Belgili bolǵandai, dál osy bap boiynsha taǵy 22 adamǵa aiyppul salyndy. Meniń oiymsha, bul aqylǵa qonymsyz. Men qazaqstandyqtar mundai qiyndyqqa tap bolmas úshin jáne olardyń quqyǵyn qorǵaý úshin osy isti buqaraǵa jariia etkim keledi. Óitkeni, biz zańsyz eshteńeni nasihattap otyrǵan joqpyz", - dep túiindedi sózin Rýfiia Mustafina.
