Petropavlda kúrdeli jóndeýden ótken botanikalyq baq búgin – Halyqaralyq balalardy qorǵaý kúni kelýshilerge esigin aiqara ashty, dep habarlaidy "Ult aqparat".
Petropavldaǵy botanikalyq baq – óńirdegi negizgi týristik nysandardyń biri. Qyzyljar óńiriniń maqtanyshy. Oranjereiany tamashalaýǵa kelgen eresekter de, balalar da ózine qyzyqty maǵlumat ala alady. Jańa keiipke engen botanikalyq baq endi týristik ortalyqqa ainalmaq.
«Kúrdeli jóndeý jumysyna astanalyq mamandar tartyldy. Kireberiske qalyqtap turǵan baqshanyń áserin berý úshin aina qoidyq. Toǵan, sýburqaq, qysqy baq, kireberis arka jónge keltirildi. Bizdiń kompaniia úsh jyl servistik qyzmet kórsetedi. Kóńilden shyqpai jatsa, olqylyqtar tabylsa, sózsiz jóndeimiz», - deidi elordalyq qurylys kompaniiasynyń ókili Asylbek Baǵanov.
Jóndeý jumystarynyń jalpy biýdjeti - 200 mln teńge bolsa, tek abattandyrýǵa ǵana 90 mln teńge jumsaldy.
«Kúrdeli jóndeýden keiin kópshiliktiń súiikti orny – botanikalyq baq ashyldy. Biregei oranjereiaǵa qala qonaqtary ǵana emes, turǵyndar da jii demalýǵa keledi. Balalardy qorǵaý kúnine orai arnaiy ashyp otyrmyz. Osydan birer jyl buryn oranjereia jabylady degen qaýeset tarady. Men bul demalys orny, kerisinshe, kórkeie túsedi dep aittym. Onyń biregeiligi – biyl qurylǵanyna 108 jyl tolyp otyr. Kúrdeli jóndeýge deiin oranjereia aýmaǵy zamanǵa sai kelmedi, eskirgen boldy. Qazir batpaqtyń ornyna sarqyrama paida boldy, túrli shaǵyn sáýlet nysandary qoiyldy. Endi osy baqqa ákeletin joldy jónge keltirý qajet», - dedi oblys ákimi.
Botanikalyq baq endi keshke de jumys isteidi. Mamandardyń aitýynsha, ár ósimdik jaryqtandyryldy, nátijesinde keshki baq ǵajaiyp kúige enedi.
Jalpy bul oranjereia – elimizdegi eń kóne baqtardyń biri. Munda tropikalyq aǵashtar, palma, limon, agava, orhideia siiaqty ekzotikalyq ósimdikter ósedi.
