Petropavlda jurtty aldap, birneshe jyl aqsha jinaǵan er adam 5 jylǵa sottaldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, 37 jastaǵy Petropavl turǵyny áielin nemese balalaryn emdeitinin aityp, 2016 jyldan beri tanystarynan túrli somada «qaryzǵa» dep aqsha alyp kelgen. Tipti qolhat jazyp, «ústinen aqsha qosyp qaitaramyn» dep aitqan.
Alaida, sózinde turmaǵan. Jinalǵan aqshany óziniń qajetine jaratqan. Alaiaqtyqtyń qurbandary onyń qaita-qaita aitqan ýádelerine senip, ábden shydamdary taýsylǵan soń, tek 2023 jyly ǵana politsiiaǵa júgine bastaǵan.
Qylmysty tergeýmen ainalysqan petropavldyq politseiler osy iske qatysty 14 epizodty anyqtady. Alaiaq tanystaryna 270 myńnan 15 mln teńgege deiin shyǵyn keltirgen.
Tergeýshilerdiń muqiiat júrgizgen jumysynyń nátijesinde bul is QR Qylmystyq kodeksiniń 190-baby «Alaiaqtyq» boiynsha sotqa jiberildi. Petropavl qalalyq soty kúdiktini aiypty dep tanydy. Oǵan 5 jylǵa bas bostandyǵynan aiyrý túrindegi jaza taǵaiyndaldy. Sondai-aq ol keltirgen shyǵyndy da óteidi.
Sot úkimi zańdy kúshine enbedi.
