Petropavlda eki er adam pnevmatikalyq qarýdan abaisyzda jaraqat aldy, dep habarlaidy "Ult aqparat".
Soltústik Qazaqstan oblystyq politsiia departamenti baspasóz qyzmetiniń málimetinshe, 27 mamyr kúni túnde Petropavldaǵy jaraqat bólimshesine pnevmatikalyq qarýdan jaraqat alǵan eki adam júgingen. Dárigerler olardyń denesine turyp qalǵan oqtardy alyp, úilerine jiberdi.
Petropavldyń kriminaldy politseileri bul fakti boiynsha tergeý júrgizdi. Er adamdar «Borner» pnevmatikalyq qarýyn ózderimen birge balyq aýlaýǵa ala barǵan. Olar qarý oqtalmaǵan dep oilaǵan.
«Kalibri 4,5 mm aspaityn pnevmatikalyq qarýdy tirkeýdiń qajeti joq. Alaida kez-kelgen qarýdy abailap qoldaný kerek. Bul oqiǵa soǵan dálel. Ol úshin qarýdy oqtaýly kúii saqtaýǵa bolmaidy. Adamǵa qaratýǵa jáne atatyn oiyń bolmasa saýsaqty shúrippege qoiýdyń qajeti joq. Oqys oqiǵalardyń aldyn alý úshin qarýdy saqtaý, alyp júrý, paidalaný talaptaryn qatań saqtaǵan jón. Politseiler qarý ielerin únemi tekserip, profilaktikalyq is-sharalardy jii ótkizip turady», - deidi SQO PD ákimshilik politsiia basqarmasynyń erekshe tapsyrmalar boiynsha aǵa inspektory Qurman Mýsin.
