Resei prezidentiniń baspasóz hatshysy Dmitrii Peskov "NATO-nyń agressivti ustanymy Kremlge eshqashan qupiia bolǵan emes" dep málimdedi. Onyń sózinshe, beibit ómir súigishtigi jaily túrli sózderi NATO-nyń túpki maqsatyn búrkei almaidy. NATO Reseidi qarsylas dep sanaidy. "Negizgi mindeti Reseige qarsy turý, Reseidi tejeý bolǵandyqtan mundai qatynastardan bas tartsaq, birdeńe ózgerip ketpeidi", – dedi Dmitrii Peskov "Rossiia-1" telearnasynyńefirinde. Peskovtyń sózin TASS agenttigi jariialaǵan.
Dmitrii Peskov Ýkraina men NATO-nyń jaqyndai túsýinen bolatyn saldardy barynsha azaitý úshin Resei qoldan kelgenniń bárin jasaidy dep ústedi. "Biz kedergi keltire almaimyz. Ol múmkin de emes… Biraq ondai qadamdardyń bizdiń elimizge áserin barynsha azaitýǵa tyrysamyz", – dedi ol.
Munan bir apta buryn Frantsiia telearnasyna bergen suqbatynda Dmitrii Peskov Ýkrainanyń NATO-ǵa qosylý múmkindigi "qyzyl syzyqtan" asyp ketetin "eń jaisyz stsenarii" degen edi. Onyń sózinshe, bul stsenarii óz qaýipsizdigin qamtamasyz etý úshin Reseidi belsendi shara qabyldaýǵa itermeleýi múmkin. Biraq ol qandai shara ekenin aitpaǵan.
AQSh Qorǵanys ministri Lloid Ostin taiaýda Kievke kelgende Ýkrainanyń NATO-ǵa qosylý múmkindigi jaily sóz etip, oǵan eshbir "úshinshi eldiń" veto qoiýǵa quqyǵy joq degen bolatyn. NATO Ýkrainaǵa esigi ashyq ekenin bildirip kele jatqanymen, Kiev áli kúnge bul áskeri odaqqa kirýge qajetti jospar almaǵan.
Buǵan deiin Resei SIM NATO-daǵy Resei ókildigi belgisiz merzimge deiin jabylǵanyn jariialaǵan. NATO-nyń Máskeýdegi missiiasy men aqparat biýrosy da jumysyn toqtatqan.
