رەسەي پرەزيدەنتٸنٸڭ باسپاسٶز حاتشىسى دميتريي پەسكوۆ "ناتو-نىڭ اگرەسسيۆتٸ ۇستانىمى كرەملگە ەشقاشان قۇپييا بولعان ەمەس" دەپ مەلٸمدەدٸ. ونىڭ سٶزٸنشە, بەيبٸت ٶمٸر سٷيگٸشتٸگٸ جايلى تٷرلٸ سٶزدەرٸ ناتو-نىڭ تٷپكٸ ماقساتىن بٷركەي المايدى. ناتو رەسەيدٸ قارسىلاس دەپ سانايدى. "نەگٸزگٸ مٸندەتٸ رەسەيگە قارسى تۇرۋ, رەسەيدٸ تەجەۋ بولعاندىقتان مۇنداي قاتىناستاردان باس تارتساق, بٸردەڭە ٶزگەرٸپ كەتپەيدٸ", – دەدٸ دميتريي پەسكوۆ "روسسييا-1" تەلەارناسىنىڭەفيرٸندە. پەسكوۆتىڭ سٶزٸن تاسس اگەنتتٸگٸ جارييالاعان.
دميتريي پەسكوۆ ۋكراينا مەن ناتو-نىڭ جاقىنداي تٷسۋٸنەن بولاتىن سالداردى بارىنشا ازايتۋ ٷشٸن رەسەي قولدان كەلگەننٸڭ بەرٸن جاسايدى دەپ ٷستەدٸ. "بٸز كەدەرگٸ كەلتٸرە المايمىز. ول مٷمكٸن دە ەمەس… بٸراق ونداي قادامداردىڭ بٸزدٸڭ ەلٸمٸزگە ەسەرٸن بارىنشا ازايتۋعا تىرىسامىز", – دەدٸ ول.
مۇنان بٸر اپتا بۇرىن فرانتسييا تەلەارناسىنا بەرگەن سۇقباتىندا دميتريي پەسكوۆ ۋكراينانىڭ ناتو-عا قوسىلۋ مٷمكٸندٸگٸ "قىزىل سىزىقتان" اسىپ كەتەتٸن "ەڭ جايسىز ستسەناريي" دەگەن ەدٸ. ونىڭ سٶزٸنشە, بۇل ستسەناريي ٶز قاۋٸپسٸزدٸگٸن قامتاماسىز ەتۋ ٷشٸن رەسەيدٸ بەلسەندٸ شارا قابىلداۋعا يتەرمەلەۋٸ مٷمكٸن. بٸراق ول قانداي شارا ەكەنٸن ايتپاعان.
اقش قورعانىس مينيسترٸ للويد وستين تاياۋدا كيەۆكە كەلگەندە ۋكراينانىڭ ناتو-عا قوسىلۋ مٷمكٸندٸگٸ جايلى سٶز ەتٸپ, وعان ەشبٸر "ٷشٸنشٸ ەلدٸڭ" ۆەتو قويۋعا قۇقىعى جوق دەگەن بولاتىن. ناتو ۋكرايناعا ەسٸگٸ اشىق ەكەنٸن بٸلدٸرٸپ كەلە جاتقانىمەن, كيەۆ ەلٸ كٷنگە بۇل ەسكەري وداققا كٸرۋگە قاجەتتٸ جوسپار الماعان.
بۇعان دەيٸن رەسەي سٸم ناتو-داعى رەسەي ٶكٸلدٸگٸ بەلگٸسٸز مەرزٸمگە دەيٸن جابىلعانىن جارييالاعان. ناتو-نىڭ مەسكەۋدەگٸ ميسسيياسى مەن اقپارات بيۋروسى دا جۇمىسىن توقتاتقان.
