«Aq jol» demokratiialyq partiiasynyń tóraǵasy, Parlament Májilisiniń depýtaty Azat Perýashev QHR-dyń Qazaqstan Respýblikasyndaǵy Tótenshe jáne Ókiletti Elshisi Chjan Siaomen kezdesti.
Qytai tarapynyń bastamashylyq etýimen ótken kezdesýde Qazaqstan men Qytai arasyndaǵy saiasi-ekonomikalyq qatynastardyń jai-kúii, investorlar máselesi jáne etnikalyq qazaqtardyń quqyqtary men múddelerin qorǵaýǵa bailanysty ózekti problemalar talqylandy.
«Nurly jol» jáne «Bir beldeý, bir jol» strategiialyq baǵdarlamalarynyń ózara úndesýi aiasynda Qazaqstan jáne Qytai jańa belesterdiń aldynda tur. Biz Qytaidan keletin investitsiiany qoldaýǵa daiynbyz. Alaida, munai-gaz salasyndaǵy birlesken jobany iske asyrýda qiyndyqtar týyndap, qazaqstandyq jumyskerlerdi orynsyz qysqartý jaǵdailary kezdesýde. Bul bizdi alańdatady. Sondai-aq, Qytai elindegi qandastarymyz, jalpy halyqtar arasyndaǵy máselege basar nazar aýdarǵym keledi. «Aq jol» partiiasynyń alǵa qoiǵan basym baǵyttarynyń biri – ol ulttyń múddesin qorǵaý», - dep airyqsha atap ótti Perýashev.
Osy oraida ol 2017 jyly Beijińde ótken saiasi forýmda «Aq jol» partiiasy delegatsiiasynyń Qytai Kompartiiasy Ortalyq komiteti basshylyǵyna QHR quqyq qorǵaý organdarymen ustalyp, qamaýda otyrǵan 112 etnikalyq qazaqtyń tizimin tapsyrǵany jóninde aita kele, «osyndai hattarǵa der kezinde jaýaptar berilse, ashyqtyq ornap, túsinispeýshilikter týyndamas bolar edi», - degen óz pikirin bildirdi.
Sonymen qatar, Azat Perýashev qarapaiym qytai azamattarynyń ómiri men turmys-salty, mádenieti jóninde qazaqstandyqtarǵa tanystyrý úshin, sol arqyly qos eldiń halqyn bir-birine jaqyndastyra túsý maqsatynda qazaqtildi tilshiler men blogerlerdiń Qytaiǵa saparyn uiymdastyrýdy usyndy. Óz kezeginde ókiletti elshi qytai úkimetiniń baǵdarlamasy aiasynda mundai is-sharany ótkizýge árqashan ázir ekendigin bildirdi.
Qytai elshisi Chjan Siao «Aq jol» partiiasynyń eldegi saiasi róline joǵary baǵa bere otyryp, «Qazaqstan men Qytai arasyndaǵy qarym-qatynasty damytýdaǵy basty maqsat – eki el arasyndaǵy rýhani birlestikti arttyrý», -dep málimdedi.
Sóz sońynda Partiia tóraǵasy aldaǵy ýaqytta qytai áriptesterimen ótetin ekijaqty kezdesýler, kásipkerler men investorlardyń basqosýlary memlekettik tilde júrgizilýi qajet ekendigin aityp ótti.
