Foto: videodan skrinshot
Astanadaǵy tergeý izoliatorynda qyzmetkerdiń áreketinen jaraqat aldym dep shaǵymdanǵan Perizat Qairattyń málimdemesi rastalǵan joq. Bul týraly Astana qalasy Politsiia departamenti resmi túrde habarlady, dep jazady Ult.kz.
9 shilde kúni Perizat Qairat prokýratýraǵa resmi shaǵym túsirip, SIZO qyzmetkeri kamera esigin qatty jaýyp, ózin qysyp ketkenin aitqan bolatyn.
Alaida politsiia bul oqiǵa boiynsha beinebaqylaý jazbalaryn zerttep, Qairattyń málimdemesi dálelsiz ekenin anyqtaǵan.
«Kamera esigin japqan kezde jaraqat aldym degen shaǵym rastalǵan joq. Bul faktini tekserý kezinde beinejazbalarda mundai oqiǵa bolmaǵany anyqtaldy», – delingen politsiia málimdemesinde.
Qazirgi ýaqytta is boiynsha tergeý jalǵasyp jatyr. Arnaiy sot-meditsinalyq saraptama taǵaiyndalǵan.
Eske salsaq, Perizat Qairat pen anasy Ǵaini Alashbaeva «Biz Birgemiz Qazaqstan 2030» qaiyrymdylyq qory arqyly 3 milliard teńgeden astam qarjyny jymqyrdy degen kúdikpen sotqa tartylǵan. Perizat Qairat buǵan deiin aiypty moiyndamai, jurtshylyqqa «shyndyqty jetkizemin» degen bolatyn.
