Astanada Perizat Qairat pen onyń anasy Gaini Alashbaevaǵa qatysty qylmystyq is boiynsha sot otyrysy jalǵasyp jatyr. Olarǵa 3,5 mlrd teńge jymqyrdy degen aiyp taǵylǵan. Bul qarajattyń bir bóligi Gaza turǵyndaryna kómek retinde jinalǵan bolatyn. Búgingi otyrysta blogerler kýálik berip, sotta ózderi qorǵa aýdarǵan naqty soma men qaiyrymdylyq týraly aityp berdi, dep habarlaidy Ulysmedia.kz.
JALPY SOMA
Dúisenbi kúngi prokýrorlardyń sózinshe, Perizat Qairat pen onyń anasy 3,5 mlrd teńge urlady dep aiyptalyp otyr. Onyń 566 mln teńgesi – Palestinaǵa kómek kórsetý úshin jinalǵan qarajat.
ASAR-ÝME
"Asar-Ýme" qoǵamdyq qorynyń prezidenti Ashat Nurmashevtiń aitýynsha, 2023 jylǵy 1 qarashada Perizat Qairat Palestina elshiligimen birge Gaza turǵyndaryna kómek jinaý bastamasyn jariialaǵan. Halyqaralyq gýmanitarlyq kómekti uiymdastyrý tájiribesi bolmaǵandyqtan, olar Perizat Qairatqa júgingen. Nurmashevtiń aitýynsha, Perizat olardy Palestina elshiligimen tanystyrǵan jáne gýmanitarlyq kómekter jinalatyn halyqaralyq qoimany kórsetken. "Asar-Ýme" qory Biz Birgemiz qoryna 200 mln teńge aýdarǵan. Jalpy jinalǵan soma – 293 mln teńge. Alaida bul qarajattyń qalai jumsalǵany týraly esep te, dálel de usynylmaǵan.
BLOGER JÁNE 80 MLN TEŃGEDEN ASA QARAJAT
Sotta jábirlenýshi retinde bloger Oljas Sadyq ta sóz sóiledi. Ol da Perizat arqyly Gazadaǵy turǵyndarǵa kómek jibergen. Onyń aitýynsha, ol áleýmettik jeli arqyly qazaqstandyqtardyń kómegimen 83,5 mln teńge jinaǵan. Bastapqyda bul qarajatty IýNISEF-ke joldaýdy kózdegen. Alaida oǵan Perizattyń ózi habarlasyp, óz qory jaily aityp bergen. Keiin olar birge Abý-Dabige saparǵa shyqqan, shyǵynnyń barlyǵyn, jolaqy men tamaqtanýdy Perizat óz moinyna alǵan. Alaida qysqa sapardan keiin Qazaqstanǵa oralǵan soń, Perizat bailanysqa shyqpai ketken.
GAZADAǴY JAǴDAI
2023 jylǵy 7 qazanda HAMAS toby Izraildiń ońtústigine shabýyl jasap, birneshe adamdy tutqynǵa alǵan. Buǵan jaýap retinde Izrail Gaza sektoryna áskeri operatsiia bastaǵan. Qaqtyǵys saldarynan Gaza turǵyndary aýyr gýmanitarlyq jáne ekonomikalyq jaǵdaiǵa tap boldy. Osy kezeńde kóptegen qazaqstandyq azamattar olarǵa kómektesý úshin belsendi túrde qarajat jinaǵan bolatyn.
