Almaty qalalyq politsiia departamentiniń Túrksib aýdandyq politsiia basqarmasynyń kriminaldyq bólim basshysynyń orynbasary Baqytjan Bákirov respýblikalyq baiqaýda «Jyl politseii» nominatsiiasynda jeńimpaz atandy. Pedofildi ustaý úshin 13-qabattan sekirip ketken tártip saqshysy bul kúnde «qazaqstandyq Betmen» atanyp ketken. Baqytjan Bákirovtiń erligine kópshilik tánti boldy. QazAqparat tilshisi onyń ózinen oqiǵa qalai bolǵany týraly áńgimelep berýin surady.
– Baqytjan, marapatyńyz qutty bolsyn!
– Rahmet. Oilamaǵan jerden taǵy da marapattaldym. «Jyl politseii» ataǵy maǵan úlken jaýapkershilik júktedi. Sońǵy eki jylda kópshiliktiń qurmetine, alǵysyna bólenip jatyrmyn. Úlken rahmet! Týǵan elime, jerime, Qazaqstan politsiiasyna ári qarai da adal qyzmet etýge ýáde beremin. Halqymynyń yqylasynan artyq alǵys joq eken, sony túsindim.
– Qai óńirde dúniege keldińiz?
– Men 1983 jyly 17 shilde kúni Ońtústik Qazaqstan oblysynyń Jetisai qalasynda dúniege keldim. Otbasyndaǵy úsh balanyń úlkenimin. Ózimnen keiin qaryndasym jáne inim bar. Ákem Anýarbek Bákirov maqta zaýytynda injener bolyp jumys isteidi. Anam úi sharýasyndaǵy kisi.
– Bul mamandyqty tańdaýǵa ne túrtki boldy?
– Kishkentai kezimnen qylmyskerlermen kúresýdi armandaitynmyn. Oǵan birden-bir sebep - filmder. Sol kezde politseilerdiń, tergeýshilerdiń jumysy týraly kinolardy jii kórsetetin. Sony tapjylmai otyryp kóretin edim. Bálkim sol túrtki bolǵan shyǵar. Óse kele politsiia mamandyǵyna degen qyzyǵýshylyǵym arta tústi. Sóitip arman qýyp Almatyǵa keldim.
– Ózińiz armandaǵan oqý ornyna túse aldyńyz ba?
– Iá. Almatydaǵy Abai atyndaǵy memlekettik ýniversitetiniń zań fakýltetine oqýǵa tústim. Grantqa ilige almadym. Aqyly bóliminde bilim aldym. 2000 jyly túsip, 2005 jyly támamdadym. Oqýymdy bitirgen soń bir jyldai óz mamandyǵym boiynsha jumys taba almadym. Qurylysta istedim.
2006 jyly elordada politsiia qyzmetkerlerine baiqaý jariialanǵanyn estip, baǵymdy synap kórgim keldi.
Nur-Sultanǵa kelip sol baiqaýǵa qujat tapsyryp, baǵyma qarai IIM akademiiasynyń alǵashqy daiarlyq oqýyn 3 ai oqydym. Osy ýaqyt aralyǵynda biraz tájiribe jinaqtadym.
– Eńbek jolyńyzdy qai mekemede bastadyńyz?
– 2006 jyly Almaty qalasy politsiia departamenti kriminaldyq politsiia basqarmasynyń jedel ýákili qyzmetine ornalastym. Eńbek jolym osy jerde bastaldy. 15 jyl boldy osyndamyn. Byltyrdan beri Túrksib aýdandyq politsiia basqarmasynyń kriminaldyq bólim basshysynyń orynbasary qyzmetine taǵaiyndaldym.
– Ómirińizdi qaterge tigip, asa qaýipti qylmyskerdi ustaý úshin 13-shi qabattan sekirgende boiyńyzdy eshqandai qorqynysh bilemedi me?
– Ol kezde men óz ómirimdi oilamadym. Maqsatym– qylmyskerden aiyrylyp qalmaý, buiryqty buljytpai oryndaý boldy. Bizge 11 shildede kúni belgisiz adamnyń Almatynyń Túrksib aýdanyna qarasty aýmaqta úi tonap, 15 jasar qyzdy zorlap ketkeni týraly habar kelip tústi. Jedel ýákilderden eki top quryldy. Sonyń ishinde men de barmyn.
– Kúdiktini neshe kúnde qolǵa túsirdińizder?
– Kúdiktini tórt kún izdestirdik. Keiin onyń páter jaldap, tyǵylyp jatqanyn anyqtadyq. Birden ony ustaý josparyna kiristik. Men jáne áriptesim jaldanǵan páter iesimen birge 13-shi qabatqa kóterildik. Qylmyskerdi ustaý úshin santehniktiń kiimin kiip aldyq. Onyń qosalqy kilti boldy.
Áiel ony shaqyryp, qubyrdan sý aǵyp jatqanyn aitty. «Ony jóndeýge santehnikter keldi» dedi. Ol dálizge shyqty, men oǵan qarai umtyldym. Ol bólmeniń birine qashyp kirip, ashyq turǵan terezeden sekirip ketti. Bul sekýndta ádette eshteńe oilamaisyń, eń bastysy - qýyp jetý. Sondyqtan men onyń artynan sekirdim.
11-qabatta terassa bar, sol jerge quladyq. Qulaǵan kezde aiaǵymnyń synǵanyn birden sezdim. Sebebi «syrt» etken dybys shyqty. Qylmysker qashý áreketin jalǵastyrmaq boldy. Bar kúsh-jigerimdi salyp, ony ýystan shyǵarmaýǵa tyrystym.
Seriktesim kelgenshe kúttim. Ekinshi top úidi qorshap turǵan edi. Olar ústine kóterilip kelgenshe pedofildi jibermei otyrdyq.
– Qazir densaýlyǵyńyz qalai?
– Sol aiaǵyma úsh ret operatsiia jasaldy. Qazir tolyq jazyldym. Densaýlyǵyma shaǵymdanbaimyn. Jumysyma oraldym.
– Erligińiz elenip, QR Prezidentiniń Jarlyǵymen II dárejeli «Aibyn» ordenimen marapattaldyńyz. Sol sátte qandai sezimde boldyńyz?
– «Aibyn» ordenin alǵan kezde keremet sezimde boldym. Kez kelgen adam madaq-marapatqa usynylsa qýanyshqa keneledi ǵoi. Men de qatty qýandym. Sondai-aq, bul marapat maǵan úlken jaýapkershilik júktedi.
– Politsei ataný úshin adamnyń boiynda qandai qasietter bolýy kerek dep oilaisyz?
– Eń aldymen, tózimdi jáne antqa adal bolý kerek. Qyzmetke ornalasqanda biz ant qabyldaimyz. Onda azamattardy qorǵaý - bizdiń jumysymyz ekeni kórsetilgen. Ár er azamattyń boiynda jiger, namys bolady. Elimiz ben halqymyzdyń tynyshtyǵy úshin eńbek etýimiz kerek. Eń úlken úlken mártebe osy dep oilaimyn.
– Ózińizdiń otbasyńyz jaiynda aityp ótseńiz?
– Kópbalaly ákemin. Jarym Maqpal ekeýmiz 6 bala tárbilep otyrmyz. 4 ul, eki qyzym bar. Úlkeni - 11 jasta, kishkentaiymyz - birde.
– Suhbatyńyzǵa rahmet!
